仲有兩個幾用就係九龍西補選，建制、 盲反兩派似乎都各自搵到代表參選，盲反派呢邊由工黨劉小麗參選、李卓人做劉小麗嘅Plan B基本上就有咩懸念架喇。就喺劉小麗、李卓人應該強勢去馬之際，人稱政壇「李克勤」嘅前立法會議員馮檢基，就搞咗個傳媒茶敍，鬧劉小麗「欽點」Plan B係「特權主義、威權主義復辟」。諗諗下，馮檢基其實又講得幾有道理，成日稱自己為「民主派」，但揀代表嘅時候就玩「欽點」，好似唔係好講得通喎！

馮檢基「老馬有火」

雖然馮檢基喺盲反派好似已經變成明日黃花咁，又畀人笑佢係政壇「李克勤」，點都唔肯退落嚟，但廣男始終都覺得馮檢基講嘢有一定道理。第一，盲反派要協商一個代表出嚟參加九龍西補選，如果搞初選嘅話，係咪一定要畀番劉小麗選都有疑問；第二，就算當係要畀番劉小麗選，咁點解劉小麗或者盲反派又可以「欽點」埋Plan B呢？難道盲反派自稱「民主派」，就要用一個咁唔民主嘅方式「欽點」出Plan B？咁就唔好再自稱自己「民主」啦唔該。

老實講，如果你問廣男支唔支持馮檢基參選，廣男當然未必會支持佢，但廣男覺得馮檢基如果要再參選，呢個係佢權利，基本上冇人可以阻止佢，而呢個亦都係民主選舉嘅表現。可惜嘅係，廣男亦都預計到，如果馮檢基「去馬」，相信佢個人都未正式話自己參選，盲反派啲政客以至支持者一定會鬧佢為建制派「助選」。所以，廣男有時都戥馮檢基可憐，明明自己係盲反派資深政客，但一次又一次畀班主流或者激進派玩到戙都冇！

劉小麗會再被DQ

另一個馮檢基都講得有道理嘅Point，如果劉小麗再成功選到立法會，而同上次一樣或「更激」嘅方式宣誓，同樣會再次被DQ。其實，劉小麗「本土」、玩嘢味道咁重，真係畀佢選到會唔會又因為玩嘢而冇咗個議席都好難講；佢再畀人DQ冇咗個議席，廣男一啲都唔關心，但如果佢又因為玩嘢、被DQ又產生補選，令到屬於市民嘅公帑又要耗費，咁大家真係多得佢唔少喇！所謂前車可鑑，支持劉小麗，同支持一個隨時玩嘢害番市民轉頭嘅政客，其實係一樣嘅。

原圖：Takungpao