近期被戲稱為「偷呃拐騙」嘅民主黨有一班盲反政客搞咗個所謂「天下為公」嘅行動，叫市民捐錢畀佢哋追查梁振英UGL事件，點知錢就收咗一大嚿，冇進展之餘剩係喺度叫疑被抹黑、誹謗嘅梁振英「自證清白」。今日，佢哋嘅立法會議員林卓廷、尹兆堅聯同公民黨郭家麒又開記者會，將「天下為公」攬炒埋鍾劍華畀梁振英告誹謗單嘢，搞咗個聯署話無懼「訴訟威嚇」、「堅持徹查梁振英」。囍雨聽晒成個記者會，諗一諗終於「突破盲腸」，林卓廷等人搞「天下為公」係威係勢，但好似無交代過市民啲錢用成點，同有咩進展喎！

「自證清白」有違普通法精神

睇睇「天下為公」搞嘅聯署，上面又係重複叫梁振英公開所有關UGL嘅紀錄，即係一個懷疑誹謗者叫一個被誹謗者「自證清白」；唔好玩啦，而家係民主黨呢班政棍指控人可能犯法呀嘛，咁指控人唔駛證據架？要被指控嘅人證明自己清白咁得意？咁好似同香港法治精神背道而馳喎！

盲反派獨有誹謗、抹黑他人的自由？

當林卓廷等人將UGL、鍾劍華疑誹謗梁振英案拉埋一齊講，仲要講到件事影響言論自由、新聞自由咁，其實係相當可笑；難道盲反派政客就有誹謗其他人嘅自由，其他人如果認為自己被誹謗，就冇自由去提出法律程序去還自己一個清白咩？囍雨就認為，如果任何人都可以隨意誹謗或者抹黑其他人而完全無法律責任，咁對言論自由嘅損害就真係大喇；至於新聞自由，從來都冇新聞自由係可以誹謗其他人嘅。林卓廷等人叫被指控者「自證清白」、唔畀人提出法律程序還自己清白，大家話係唔係破壞法治先？

籌款去向、「調查」進度零交待？

老實講，點解林卓廷等人嘅「天下為公」要同鍾劍華疑誹謗梁振英單嘢拉埋一齊講，仲多咗個郭家麒出嚟話要聯署、眾籌，囍雨就唔清楚喇；或者林卓廷班人根本「冇料到」又越嚟越少人理佢哋，所以搞搞新意思拉埋同事件無關嘅一件誹謗案嚟講。但囍雨留意到一個位，就係個記者會作為一個講UGL事件嘅場合，林卓廷剩係話會同尹兆堅飛去英國見呢個、果個，但佢哋向市民籌咗咁多錢，點解佢唔講清楚而家用咗幾多錢呢？唔係諗住一句「有啲單」未番就唔駛交待呀？

仲有喎，佢哋之前已經駛咗一筆錢，最主要係用嚟畀唔同地方嘅律師費，咁畀咗咁多律師費出去，而家開記者會係咪應該同公眾交待下法律意見點講呢？係佢哋有「苦衷」或者為咗下一步行動要保密，定係連啲律師都同佢哋講「無Case」，搞到佢哋開記者會都竟然唔交待清楚法律意見講乜呢？呢件事真係非常可疑。另一個問題，就係佢哋搞「天下為公」都搞咗幾個月，到而家一啲進展都冇，唔通啲人話林卓廷佢哋搞「天仙局」攞市民錢做政治騷係真嘅？好心林卓廷開記者會就將啲嘢講清楚啲啦！

原圖：「天下為公」Facebook