呢兩個星期開學，本來坊間最應該討論嘅就係開學應該準備啲咩，又或者係留意學生情緒等社會問題，但由上星期開始，唔同大學嘅開學禮都先後出現大學生代表發表激進甚至「港獨」言論，先有港大學生會會長大聲呼喊要有「造反嘅勇氣」，後有教育大學學生會長鼓吹「香港獨立」；去到今日，就輪到中大學生會會長發表「獨」論，話港人治港、高度自治嘅「真正」一面就係「港獨」嘅延伸。咁都講得出口，到底呢位學生代表係唔熟「一國兩制」，定係High得濟喺度亂講嘢？

高度自治是「港獨」延伸？

根據傳媒報道，中文大學今日舉行開學禮，其實喺開學禮前中大學生會已經講明會提「港獨」架喇，咁喺正式進行開學禮嘅時候，中大學生會會長梗係宣「獨」啦；呢個叫區倬僖嘅中大學生會會長話，「港獨」係一個政治立場，可以視佢為香港嘅一個出路，唔可以分絕對嘅對與錯；仲話《基本法》中所提到嘅港人治港、高度自治嘅「真正」一面就係「港獨」嘅延伸。區倬僖咁講法，係想講「港獨」延伸落去先至係「高度自治」，定係想講高度自治伸延落去，就會變咗「港獨」呢？

老實講，廣男先唔講「港獨」不可能亦不可行嘅事實，呢位區同學引用《基本法》嚟講「港獨」，真係令到人「當堂嚇一跳，然後得啖笑」。《基本法》或者「一國兩制」所賦予嘅港人治港、高度自治係香港作為中國一個特區嘅體現，但港人治港、高度自治唔代表可以搞「港獨」，因為《基本法》嘅第一條已經寫明「香港特別行政區是中華人民共和國不可分離的部分」；如果將呢個概念視為「港獨」嘅延伸，好明顯就已經唔關《基本法》事啦，所以區同學攞《基本法》嚟講，真係令人摸不著頭腦。

「港獨」當潮流

見到咁多大學生將「港獨」變成對外演講或者行動嘅「政治口號」，廣男覺得證明咗社會幾年以嚟嘅憂慮「逐漸成真」；「空穴來風，未必無因」，而家唔同大學嘅大學生都話要「港獨」，好明顯「港獨」就算唔代表所有大學生嘅意願，起碼裡面有一部份學生認為香港要搞「港獨」先有所謂「出路」。可能大家而家覺得「港獨」仲唔係好關大家事，但係當大家發現關自己事嘅時候，可能已經係身邊有年輕人走出嚟以身試法而破壞到社會、斷送咗前程嘅時候；有旺角暴動嘅「前車」在先，廣男就唔會對「港獨」問題太樂觀，當再發生事先去處理嘅時候，恐怕事情已經變得好難收拾。

圖片來源：中大校園電台Facebook截圖