UGL事件發生咗幾年，雖然當事人全國政協副主席梁振英、政府、UGL甚至率先報道事件嘅澳洲傳媒都已經講得清清楚楚，但係盲反派政客仲係好鍾意利用UGL一事抹黑梁振英。最近，社民連梁國雄又玩埋一份，去廉署話要舉報梁振英，而公民黨立法會議員郭家麒等人就去聲援佢。對於梁國雄所謂「舉報」，講到尾又係做政治騷，如果有人真心想去廉署舉報其他人，應該好低調先啱，好似梁、郭二人拉晒Banner、叫晒記者到場，點睇都似係玩嘢多啲囉。

梁國雄做騷 郭家麒老屈

根據傳媒報道，梁國雄受兩件事啟發，所以決定到廉署做騷，包括梁振英最近發律師信指控他人誹謗等等；梁振英出律師信所以要去廉署舉報佢？咁係咪即係見梁振英對其他人有法律行動，佢自己唔鍾意就隨便去廉署做政治騷呢？如果係咁嘅話，好明顯唔單止利用傳媒抹黑梁振英，大家甚至可以話廉署都畀佢當係佈景板，陪佢一齊「做戲」！

至於郭家麒，囍雨覺得佢根本就係老屈梁振英，佢同傳媒講梁振英喺特首任內，政府批好多合約畀禮頓，認為廉署要查梁振英任內有冇向行政會議申報云云。咪住先，梁振英2011年尾同UGL簽署為期兩年嘅不競爭、不挖角協議，協議2013年12月結束後代表梁振英同UGL無任何關係，持有禮頓亞洲公司嘅CIMIC喺2016年11月先成為UGL主要股東，即係梁振英根本同CIMIC或者CIMIC持有嘅禮頓亞洲公司無直接或間接關係，咁郭家麒講到禮頓同梁振英有咩關係咁，係咪砌梁振英「生豬肉」先？

純屬抹黑的政治行為

其實就住UGL事件，各方人士尤其係梁振英本人都已經回應過好多次，梁國雄、郭家麒等人好似從來冇聽過咁，佢哋對於梁振英嘅回應，到底有邊度唔滿意先？如果冇又只係提出啲似是而非嘅指控，咁喺無證無據嘅情況下去指控人，同老屈根本有咩分別？簡單嚟講，梁國雄、郭家麒一齊去廉署所謂「舉報」，其實只係一種純屬抹黑嘅政治行為！

原圖：RTHK