自從去完台灣「五獨」論壇，大肆發表「港獨」言論後，戴耀廷嘅「港獨」言行越嚟越出位，近期仲不斷寫文講「港獨」，一邊戴住頭盔話自己「現階段」唔支持「港獨」，一邊又係咁探討「港獨」可行性；噚日，佢又搞「新意思」，喺自己Facebook專頁向全國政協副主席梁振英挑機，話如果梁振英願意，佢可以喺公開場合同梁振英討論「港獨」問題，點知當梁振英勇敢地喺佢Facebook留言，問佢反唔反對「港獨」嘅時候，佢就即刻龜縮，話要討論嘅，唔係咩支持與唔支持。戴耀廷「又要挑機又要縮」，「又要威又要戴頭盔」，咁當初做乜要挑人機攞嚟瘀呢？

要辯論但冇立場 辯甚麼？

老實講，廣男覺得呢單嘢真係非常好笑，當大家見到戴耀廷公開叫梁振英「辯論」嘅時候，大家都以為戴耀廷已經準備好同梁振英嚟一場支持「港獨」或者反對「港獨」嘅大辯論啦，點知無懼「獨」派氣焰嘅梁振英「深入敵陣」，喺戴耀廷Facebook問番戴耀廷一句「戴耀廷先生，你反對港獨嗎？」，戴耀廷就即刻龜縮，話「我想我們要討論的，不是那麼簡單支持與不支持，而是要知道為何港獨會在香港出現。支持的要知道，反對的更加要知道，好對症下藥」，廣男真係好奇，戴耀廷叫人討論，但自己冇立場咁得意呀？

戴耀廷叫人討論但自己又唔敢表明立場，就好似一個人叫人同佢辯論係咪要填海起屋咁，但到人哋問佢，咁戴先生你咩立場先，戴耀廷就話大家唔係要簡單講支唔支持，而係傾點解有人要提出填海想法；喂，戴耀廷講啲嘢，會唔會「空廢」咗少少呢？唔好笑大人個口啦！

誠如梁振英所言，咩問題都可以有很多成因，例如青年人吸毒嘅成因有好多，戴耀廷因此就唔可以公開反對吸毒嗎？老實講，廣男唔覺得戴耀廷近日係咁講「港獨」只係想搵出當中成因，或者咁「好心地」地「對症下藥」，而係係咁借討論或者學術研究煽動「港獨」！

「港獨」力量 全速發展

無論係戴耀廷、《學苑》、陳浩天甚至已經入獄的「本土民主前線」也好，已經說明了香港已經有一股為數不少的「港獨」力量，筆者肯定，如果社會再把「港獨」問題視為不痛不癢的小事，那麼香港就注定要面對一場比違法佔領禍害更大、影響更持久的持續動亂。再相信戴耀廷是「書生論劍，一事無成」的想法，也實在太天真了。 

原圖：Takungpao