「港獨」主張喺香港早已唔係「講吓」，暴力光復、自製武器兵工廠、旺角暴動，呢啲就係「港獨」暴力化嘅最好例子。有人會問，到底「港獨」意識係點形成嘅呢？唔好意思，呢個博士論文級題目，仲係留畀有識之士去客觀分析最妥當，若然好似嗰個冇博士學位嘅所謂法律學者戴耀廷咁用歪理去分析「港獨」成因，咁就貽笑大方啦。戴耀廷比喻有幾荒謬？等草根出身嘅囍雨用常識去K.O.佢啦！

將責任推落中央政府

戴耀廷整篇文章只係將「港獨」成因推晒落中央政府度，一時又話因為中央政府唔畀「真普選」香港市民、一時又話內地同香港文化差異逐漸擴大，佢最後甚至形容，內地同香港係盲婚啞嫁嘅「夫妻關係」，話女方（香港）的不滿即使一時被男方嘅強權壓下去，也不會心服，離心就自然會產生出嚟。

要點出戴耀廷呢個說法嘅荒謬，囍雨認為要從幾方面入手。首先，中央政府唔係唔畀「真普選」香港，而係戴耀廷等人喺上次政改嘅普通方案出台之前兩年，已經開始四處宣傳佢哋口中嘅「佔領中環」行動，講到明要令到香港金融同商業中心一帶地區交通同運作癱瘓，藉以要脅中央同特區政府就範。

一手推倒普選 戴耀廷諉過於人

提出呢種「未坐埋溝通，先摑對方幾巴」策略嘅人，正正係今日喺報紙大談「港獨」成因嘅戴耀廷，枉佢仲好意思話中央唔畀「真普選」香港所以產生「港獨」，咁卑鄙嘅言論都講得出口，喺今日香港真係只有盲反派先至做得到。再講，中央並唔係唔畀「真普選」香港，大家諗返清楚，當日係盲反派一手拉倒香港嘅普選方案，如果當日政改獲得通過，舊年選特首嘅時候，全香港五百幾萬合資格選民都可以落場參與，而唔係喺電視辯論或者電腦前打口水戰！

至於戴耀廷用盲婚啞嫁嘅「夫妻關係」去形容香港同內地，呢個比喻就更加不倫，亦係呢位所謂學法學者唔識歷史嘅表現。歷史上，香港早於秦朝（係呀，秦始皇嘅秦朝呀！）已經正式納入中國版圖，即係足足二千二百年前已經係中國一部份，兩地關係更加唔係「夫妻」，因為香港係中國一部份，你可以形容香港係中國「全身」嘅其中一個器官，但就點都唔係「夫妻」囉！

戴耀廷想合理化「港獨」

囍雨認為，戴耀廷用「夫妻關係」去形容香港同內地，明顯唔係手民之誤或者無知咁簡單，而係刻意為之。今日香港，相信絕大部份人都明白，「結婚」唔代表必然可以一生一世，要「離婚」亦有法可依。戴耀廷用可以合法分開嘅婚姻關係形容香港同內地，講穿咗咪即係想煽動香港人認同「港獨」係可行嘅、係有根有據嘅、係好平常嘅、係好普遍嘅；佢到底係唔係「港獨」份子，大家心清眼亮，一定明白嘅。

原圖：wenweipo