一個星期前，民主黨元老李柱銘喺《生果報》撰文，內容係話外交部向香港外國記者會（FCC）發信，希望對方唔好為民族黨陳浩天搭台宣揚「港獨」，其實只係「例行公事」，只係為向上頭「交差」而不得不做，又話高壓打擊「港獨」，反而會帶來反效果云云。一星期過去，到底李柱銘嘅所謂分析正唔正確呢？睇返國務院副總理韓正尋日嘅言論，廣男夠膽講一句，李柱銘確係「錯到加零一」！

韓正是中央執行港澳事務領導

韓正係邊個，相信讀者都好清楚，但點解佢喺港澳事務上嘅言論咁有代表性呢？呢一點或者有啲讀者就未太明白喇。其實，韓正除咗係國務院副總理之外，佢另一個身份係中共中央政治局常委，係國家少數「正國級領導人」之一；而佢喺港澳事務上嘅發言之所以咁有份量，全因佢另一身份係中共中央港澳工作協調小組組長，亦即係話，佢係中央負責執行港澳事務嘅一把手！

講完背景，咁韓正尋日講咗咩呢？話說尋日由一眾本港紀律部隊高層組成嘅訪京團，尋日獲得韓正接見，韓正發言時清楚表明對港獨「零容忍」，仲盛讚保安局按程序取締鼓吹「港獨」嘅民族黨「非常正確」。此外，韓正除咗充分肯定香港紀律部隊嘅工作外，仲特別提出幾點希望，包括「全面準確理解和貫徹一國兩制方針」同「堅定有效地維護國家安全」。

淡化中央「反港獨」決心 李柱銘其心可誅

講咗咁耐，中央政府對「港獨」嘅態度係點，相信都已經唔使點拗。李柱銘一星期前話當日外交部發信畀FCC只係為「交差」、係「例行公事」，若然佢唔因為無知而錯判形勢，佢就係刻意誤導社會，嘗試將「港獨」嘅責任推落梁振英同建制派嘅身上。當然，廣男唔係話韓正會直接回應李柱銘啦，咁講只係抬舉咗李柱銘呢個承認「日日做漢奸，有需要時就做漢奸」嘅政客；廣男喺呢度想帶出嘅係，對於分離主義、對於分裂國家，中央政府態度就係堅決同強硬。

大家撫心自問，有人未得你同意，就要將你身上忽肉切出嚟，你係唔係會誓死反抗呢？呢個咁簡單道理，就當普通香港人唔明都好，李柱銘亦冇可能唔明。刻意淡化中央政府對「港獨」嘅睇法、嘗試將「反港獨」抹黑成為「左」，李柱銘同佢老友黎智英份《生果報》想搞乜，大家心照啦。

原圖：新華網、RTHK