涉嫌誹謗全國政協副主席、前特首梁振英嘅所謂學者鍾劍華，今日正式向原本由佢本人擔任信託人嘅「守護公義基金」（「基金」）求助，並且迅速獲得答應支持，個基金會幫佢籌款打官司，仲隨即搵咗已經被選民唾棄嘅過氣立法會議員何秀蘭代替鍾劍華出任信託人。呢個咁嘅「基金」，一早已經被人詬病運作極不透明，而且籌款目的成日轉來轉去，改變捐款用途之前又冇正式諮詢過捐款人，今次仲因為「自己友」嘅「私人理由」幫手籌款，香港市民真係仲要捐錢畀個咁嘅機構？

守護公義？何來公義！

由於梁振英已經正式入稟控告鍾劍華，故此關於單案嘅內容，囍雨喺度唔會再提起。囍雨想帶出嘅係，「基金」決定幫鍾劍華呢個舉措，實實在在係一啲都唔公義：一個擺明係自己友（前信託人）嘅人向基金求助，個基金隨手搵嚟另一個「自己友」（過氣立法會議員）做信託人，跟手就決定出手相助，到底個批核過程係點？點解公眾一啲都唔知道？運作咁黑箱，點解仲可以用「公義」兩個字？剩係「程序公義」都已經冇啦！

仲有一點，梁振英依法維護名譽，用嘅係自己錢（或者最後勝出官司會有賠償，但都係後話）；涉嫌誹謗、拒絕收回言論嘅鍾劍華，竟然唔想用自己錢抗辯，你話荒唔荒謬？大家記住喎，誹謗法例歷史悠久，並唔係度身訂造嘅新法例，鍾劍華疑似明知故犯，試問同公義有乜關係？況且，香港嘅司法獨立同法院嘅水平受到世界各國認可，將誹謗官司交上法庭明顯係最文明做法，鍾劍華寫得出涉嫌誹謗嘅文章，好應該「一人做事一人當」，走去問「基金」拎錢，乜真係合理咩？唔好玩啦，拜託！

常搬龍門 黑箱作業

仲有，囍雨之前已經寫過好多次，呢個咁嘅「基金」嘅捐款用途已經改過幾次，每次嘅改動同樣係「黑箱作業」，由最初話籌款幫被DQ嘅四名前立法會議員上訴打官司，去到後來突然又為會將捐款用喺「佔領九疑犯」身上，嘗試為佢哋洗脫罪名。「佔領九疑犯」當年參與「違法佔領」嘅時候，一早講明被檢控時會「俯首認罪，完善法治」吖嘛，因為「基金」要用善款幫佢哋「走數」呢？咁又係「公義」咩？

講到底，呢個所謂「基金」早已經淪為盲反派人士嘅提款機，嗰班所謂信託人喜歡點改動捐款用途就點改，完全唔使問過捐款嘅市民架，囍雨真心想再一次問：呢班人成日將「程序公義」掛喺口邊，咁佢哋改動善款用途嘅程序，係唔係又真係咁公開、咁公義呢？大家不妨自己諗諗啦！若然有人要捐款畀佢哋、想倒錢落海，唔緊要架，囍雨無權置喙，只係希望班捐款人最後唔會後悔啦！

原圖：RTHK