一直公開極力反對香港外國記者會（FCC）邀請「港獨」份子陳浩天做午餐會演講嘉賓嘅全國政協副主席梁振英，尋日喺個人社交網站發文，再次公開呼籲所有FCC嘅會員要關注，該會會址租約期滿後未必可以再次「自動獲得」續約，甚有可能要同其他團體公開競爭，故此希望佢哋關心一下自己所付會費會唔會血本無歸。明明所講嘅係公開事實，偏偏一向針對梁振英嘅《生果報》就偏要曲解梁振英嘅文章為「嚇鬼」，疑似又想誤導讀者呢個提醒係「打壓」，認真無賴。
FCC係不折不扣「特權階級」
到底FCC可以不斷以「不公開競投」形式獲得特區政府續租現時中環雪廠街會址，算唔算特權呢？囍雨認為，大家應要先睇睇件事嘅「歷史」先得。FCC遷入雪廠街現址前，會址位於中環壽德隆大廈，大約係現時干諾道中中國建設銀行大廈嘅位置。
1980年初，FCC被業主通知將加租超過一倍，由於急需尋找新會址，FCC時任領導人Donald Wise就寫信畀港督麥理浩；六個星期後，麥理浩回覆，提議FCC用位於雪廠街嘅舊牛奶公司倉庫做會址（即係現時會址），而FCC最終就喺1982年遷入現址。
不必公開競投都唔係「特權」？
港英殖民地政府喺不公開競投嘅情況下，將雪廠街會址租畀FCC，租約條款對外不公開，普通市民查閱唔到份租約內容。請問《生果報》一聲，喺呢種情況下，FCC算唔算係有「特權」？就當係用市價租都好，咁係唔係「特權」？
冇錯，呢種提供畀FCC嘅「特權」回歸後仍然持續，不過無論係歷史原因又好、係蕭規曹隨又好，總之今日FCC嘅租約安排問題，已經因為佢哋堅持邀請鼓吹違反《基本法》同破壞「一國兩制」嘅人去演講而受到公眾關注，咁等到佢現時租約期滿後檢視續租安排，其實都係正常不過吖！乜真係算「打壓」咩？
《生果報》口中反特權 卻支持FCC擁特權
老老實實，就算喺政府公屋裡面做違法事項，房屋署都可以收返間公屋啦，到底有咩問題先？再講，大家唔該睇清楚梁振英篇文章係點講先，佢並冇話要「即時」收回會址，只係話到現行租約期滿、即係2023年嘅時候，相信一定有其他組織要求公開競投雪廠街會址使用權。囍雨想問《生果報》，如果真係有組織咁要求，特區政府可以憑乜去拒絕？再推論落去，如果真係有公開競投，咁FCC就唔一定可以續租架啦，試問又關「嚇鬼」乜事呢？
《生果報》，雖然你哋都已經冇乜傳媒操守可言架喇，但唔該，做人做事都秉持住條良心底線，唔好乜嘢都推到去政治理由，一時話人「打壓」、一時又話人「逼害」，《生果報》一向好反對「特權」架喎，咁佢哋都好應該要求將FCC會址嘅使用權作公開競投吖！
原圖：《蘋果日報》截圖