今個月初，一班唔滿意民主黨立法會議員許智峯「強搶」女政府人員手機嘅市民去到佢個辦事處請願，點知畀「非常有禮貌」嘅許智峯議辦助理請走，封請願信仲即場畀人撕爛，認真有「家教」。噚日，班市民又自發到許智峯另一個議員辦事處遞交請願信，譴責許智峯侮辱女性，地點雖然不同，但結果竟然一樣，就係再次被辦事處職員撕毀請願信。見到許智峯以至佢嘅職員咁樣對待市民，廣男剩係諗到一句，「好大嘅官威呀，尊貴嘅立法會議員許智峯！」

民選議員不顧民意

嗱，民主黨好，許智峯都好，其實示威請願佢哋自己都成日做，根本冇可能撕毁請願信咁無禮；調番轉咁講，如果係民主黨其他人或者許智峯自己如果帶隊去請願，而對方當場撕毁請願信嘅話，相信民主黨、許智峯都一定會高調、重複地譴責對方無禮兼踐踏民意。而許智峯作為民選議員，佢旗下嘅職員竟然公開咁無視市民嘅意見，而且仲要即席侮辱請願者，大家話係咪有啲過份呢？

如果呢個撕信事件發生一次，大家可以諗呢啲可能只係個別許智峯辦事處職員自己決定嘅粗暴行為，但而家一個月內發生兩次，仲要係喺唔同嘅許智峯議辦出現，廣男真係好懷疑，係咪許智峯本人自己向議辦職員落Order，話如果有人因為佢嘅「犯罪行為」去表達意見，收到請願可以當睇唔到甚至直接撕毀佢，試問如果唔係許智峯「畀膽」啲職員，點會唔同辦事處嘅職員都會咁無禮對待市民呢？呢件事實在太可疑！

許智峯應為事件作交代

對於「一而再」發生許智峯議辦嘅職員撕毁請願信一事，廣男覺得許智峯本人一定要出嚟交代清楚，到底撕毀請願信係佢嘅議辦職員自行決定做出無禮、侮辱他人嘅行為，定係根本係佢指示職員咁做！另一個問題，就係許智峯喺「搶手機」案發生後自己同民主黨領導層都出過嚟向公眾鞠躬道歉，而家有市民請願要求佢呢個「嫌疑犯」辭職，唔係好合理咩？

民主黨上下唔該講返句，你哋個黨雖然反口覆舌唔肯紀律處分許智峯啫，但唔係連佢同旗下職員拒收請願信、即場侮辱示威者等等劣行都唔肯處理呀？許智峯而家咁對市民，甚至佢議辦職員撕毀請願信，係咪即係覺得市民唔可以譴責佢，甚至覺得自己無錯係市民唔啱呢？凡此種種問題，除咗許智峯本人有必要出嚟交代清楚外，民主黨作為老牌反對派，唔該亦唔好繼續做縮頭烏龜，行出嚟面對批評啦！

原圖：wenweipo