「香港民族黨」陳浩天去香港外國記者會（FCC）宣揚「港獨」，畀社會各方人士鬧到爆，但盲反派唔少分析都認為陳浩天「一舉成名」；陳浩天可能見呢排比較多人留意佢，佢日前又搞小動作，向美國總統特朗普發公開信，話要求撤銷香港同中國嘅世界貿易組織成員身份，仲想香港都受到制裁，不過美國就好似唔多理佢，美國駐港總領事仲話香港仍然有足夠自治，可以得到特別待遇。「熱面貼著冷屁股」嘅陳浩天跌咗落地都要攞番炸沙，聲稱「民族黨」係為香港利益、「站在正義一方」等等。下，而家陳浩天擺明靠害香港仲話自己係「正義」？唔好玩啦！

宣揚「港獨」豈是正義！

畀美國駐港總領事館請佢食完檸檬嘅陳浩天，似乎非常不甘，噚日喺「民族黨」嘅Facebook發帖，話「民族黨」係以香港利益作最大依歸，稱香港要避開貿易戰，就要同國家撇清關係，要做一個「主權獨立嘅香港」，仲話「民族黨永遠站在正義的一方」。囍雨實在好奇，一個一心搞亂香港嘅政黨或者政客，邊度「正義」呢？

首先，囍雨就覺得「民族黨」要搞香港獨立，既係分裂國家、危害到社會秩序的行為，亦都係想將香港推入亂局嘅主張，根本就一啲都唔正義。唔同嘅人對正義都有唔同嘅睇法，但要分裂國家、危害市民嘅行為，Sorry，囍雨完全唔覺得係正義。另一個問題，如果「民族黨」或者陳浩天覺得自己係「正義」，咁叫其他國家制裁埋香港，想香港廣大市民受害，呢啲係咩「正義」？呢啲破壞香港嘅行為，係不義、叛逆就真！

美國不領「人情」

今次陳浩天要求美國制裁香港而美國駐港總領事館嘅回應，囍雨覺得都算幾公道，起碼美領事清楚指出香港係有足夠嘅自由或者自治，可以支持到美國繼續喺雙邊協議同計劃上給予特別處理。其實陳浩天等政棍講到「一國兩制」或者《基本法》已死咁，但佢自己依然可以每日喺度「反中亂港」，而盲反派傳媒又可以大肆報道幫佢宣傳，呢啲就係「一國兩制」下《基本法》所提供嘅保障囉！不過，言論、結社或者集會自由，係唔包括搞「港獨」、分裂國家嘅自由，Okay？！

原圖：Takungpao