「香港民族黨」陳浩天去香港外國記者會（FCC）宣揚「港獨」，香港社會普遍都持反對態度，唯獨盲反派以至佢哋嘅喉舌媒體就處處為陳浩天護短。今日睇新聞，見到盲反派元老、資深大律師李柱銘又再為陳浩天開脫，大意就係話一班「治港者」嘅「追捧」，陳浩天先會「一夜成名」，批評建制派「越左越幫倒忙」云云。囍雨真係要問下李柱銘，乜佢唔係都係反對「港獨」嘅咩？點解佢唔評論下陳浩天嘅言行有冇問題，而要轉移視線批評勇於為事件發聲嘅人呢？即係佢身為律師，認為社會見到不公義（分離主義）嘅事都唔應該出聲？

李柱銘玩轉移視線

綜觀李柱銘喺《生果報》刊登嘅文章，主要係想講外交部駐港特派員公署等發聲明，其實只係對FCC「溫馨提示」，甚至係向上頭交差嘅例行公事，佢自己去英國、加拿大等地方，都畀人「招呼」過唔少次；但全國政協副主席梁振英等人「上綱上線」，正係令到原本寂寂無聞嘅陳浩天「一夜成名」，仲話今次對FCC嘅「批鬥」行為破壞特區嘅國際聲譽，令國際社會更唔信任中央政府有守約喺香港落實「一國兩制」喎。

囍雨首先要質疑李柱銘，乜佢去外國「唱衰」中國同香港有做過同陳浩天性質相同，即係推動分裂國家、分離主義或者「港獨」咩？冇吖嘛！咁兩者又點可以直接類比呀？佢唱衰香港同國家咁耐都安安全全，呢個咪「一國兩制」囉！至於外交部駐港公署、港澳辦接連發聲，乜真係李柱銘所講，只係「溫馨提示」咁簡單咩？喺FCC事件上，外交部先要求FCC重新考慮邀請，之後再發表聲明「強烈譴責」，點睇都係「認真對待」，而絕非「交差」囉！李柱銘講到咁少事，擺明就係誤導市民。

講真，如果李柱銘真係正如佢自己所講，係擁護「一國兩制」兼反對「港獨」嘅話，咁唔該佢睇清事件嘅本質：有人違反《基本法》宣揚「港獨」，任何真正想落實「一國兩制」嘅人都有責任挺身而出去批評同譴責，道理好簡單之嘛，如果佢真係認同「港獨」主張本身係錯、係有問題，而又會影響國家安全嘅話，點解唔企出嚟批評呢？呢個同「左」又有咩關係呢？李柱銘你唔好混淆視聽啦！

擁護「一國兩制」 就要反「港獨」

反反覆覆、來來去去，李柱銘都係為鬧而鬧，想諷刺率先勇於企出嚟提醒香港人嘅梁振英係「港獨之父」啫，根本唔係講緊道理囉。李柱銘文中形容到「港獨」不成氣候，所以批評佢就代表「左」云云；唔好意思問句，佢傻的嗎？正因為未成氣候，所以先要出口譴責，成咗氣候香港仲得掂？作為一個法律專業人士唔去指摘犯罪者有錯，反而話「如果唔係你哋話佢犯法，佢而家就唔會咁受『歡迎』啦，你哋話你哋係咪『超錯』先？」，囍雨除咗「佩服」李柱銘作為資深大狀嘅詭辯能力，都唔知講咩好！

況且大家只要細心留意李柱銘行文，就會發現當中有一個非常矛盾嘅地方，佢聲稱中央、「治港者」咁做影響特區聲譽甚至會令人唔信任「一國兩制」嘅落實；大家要問下李柱銘，如果有人堅決要搞「港獨」，唔係先係破壞「一國兩制」同《基本法》法咩？而唔理係外交部、特區政府以至其他建制人士，發聲反對「港獨」唔係正正係維護「一國兩制」嘅表現咩？李柱銘一邊聲稱支持「一國兩制」，一邊又縱容陳浩天等宣揚「港獨」嚟破壞「一國兩制」，根本就係自相矛盾！

原圖：RTHK