「香港民族黨」陳浩天公然宣揚「港獨」，更將祖國扭曲成「殖民者」，結果受到全城譴責。點知呢個陳浩天似乎仲未「夠皮」，日前竟然發信畀美國總統特朗普，要求對方撤銷香港同中國世貿成員身份云云。先唔好講陳浩天去信對象出錯呢啲咁低級嘅錯誤，主動要求美國介入中國內部事務，公然出賣香港利益，陳浩天行為本身就極之令人髮指，不過美國亦唔見我賣佢帳喎，美國駐港總領事館回覆香港傳媒時講明，美國喺同香港嘅雙邊協調上仍然會予以特別處理喎；陳浩天出賣國家民族，點知竟然「熱臉貼著冷屁股」兼夾醜出國際，真係大快人心呀！

美國：香港仍有足夠自治

美國駐香港代表回覆傳媒時，雖然冇直接談到陳浩天嘅「無理要求」，但就重申《美國—香港政策法》建立咗一個機制，將香港視為一個有別於中國嘅特區（特別關稅區）對待，仲引用美國國務院2018年嘅報告，強調認為香港有足夠程度嘅自由，以支持美國繼續喺雙邊協議同計劃上給予特別處理。換句話講，即係「睬你都傻」，陳浩天你到底仲要出醜到何時呢？

為咗爭取佢心目中嘅「港獨」，陳浩天不惜出賣所有香港人，希望香港人「攬住一齊死」；大家可以想像一下，若然香港經濟下滑，甚至因為有人搞「港獨」而民不聊生，到底咩人最受影響？肯定唔係商家或者富豪架，一定係廣大市民首當其衝囉！口口聲聲話「搞港獨」係要令香港好，但家陣就有理冇理搞爛搞臭成個香港先算，乜陳浩天真係咁偉大咩？咪玩啦！

盡快處理民族黨問題

政府給予「香港民族黨」申述嘅時間將至，到底民族黨會唔會成為「非法社團」，好快就會揭曉，陳浩天不知收斂，仲趁住呢段時間喺國際媒體面前重申「港獨」立場，更加時主動要求外國勢力干預香港添，種種喪德敗行，正正證明「民族黨」係一個不折不扣影響到國家安全、社會秩序嘅「非法社團」咩？陳浩天「越做越多」，其實好可能只係向執法部門提供越多「罪證」。 

原圖：Takungpao