仲有大約兩星期就開學，唔少教書科都會因應需要而改版，近日有通識教科書擬作改版，加入違法佔領嘅例子，就畀《生果報》話係「中聯辦出通識課本洗腦」；近年大家對於「洗腦」呢個話題都相當之敏感，於是廣男又睇下相關報道，諗住睇下啲課本「點洗腦法」啦。原來，《生果報》所謂「洗腦」，就係話人內容包括有「政府不會因為市民表達的激進程度而妥協，違法行為不可能改變政府的施政方針」等等，廣男又真係唔係好明，教科書寫政府唔會向違法、激進行為妥協，邊度有洗腦？教科書質疑激進、違法行為，乜唔係先應該係應有之義咩？係唔係要教「違法達義」先叫「中立持平」？

《生果報》又屈人「洗腦」

嗱，如果教科書內容係有偏頗，或者明顯係講與事實不符嘅嘢，咁《生果報》話人「洗腦」都未遲；但廣男睇番一系列報道，人哋本擬作改版嘅教科書寫「違法行為不可能改變政府的施政方針」等陳述，根本完全唔覺有任何所謂「洗腦」嘅感覺。調番轉咁講，如果本教科書話叫人去用激進手段表達訴求，或者叫人去犯法，咁就真係叫「洗腦」喇！

《生果報》引述反對立場鮮明教師嘅分析，話教科書好似變咗「政府發言人」咁。問題又嚟喇，一本教科書，正常嚟講梗係導人向善、教人唔好犯法啦，陳述根本同「洗腦」完全沾唔上邊，《生果報》大字標題話人「洗腦」，其實係咪《生果報》想「洗人腦」，唔畀人反對違法佔領，甚至想叫人支持違法佔領先？

「洗腦者」是誰？

如果大家有留意幾年前開始嘅違法佔領新聞，都會知道自戴耀廷喺2013年講違法佔領，到2014年9月違法佔領開始前後，《生果報》等盲反派媒體根本就係違法佔領嘅「最大推手」，成日用篇幅極多嘅版面報道違法佔領嘅新聞，佢哋嘅管理層甚至親自到佔領現場撐場；而家有教科書對違法行為提出質疑，就好似大大巴摑咗落《生果報》塊面咁，《生果報》話人「洗腦」，其實只係「條件反射」咁唔畀人反對違法佔領，不過論述完全唔合理囉！ 

原圖：《蘋果日報》截圖