《生果報》對冇咗特首已經好耐嘅全國政協副主席梁振英（CY）似乎特別有興趣，三日唔埋兩日仲要搵啲嘢嚟講吓咁，認真夠神心。今日之嘛，嗰個《生果報》嘅專欄作家古德明劈頭就重提某時事評論員因誣衊CY同黑社會有關而收律師信一事，繼而就引大量似是而非例子話中央政府即使同黑社會合作其實冇乜大不了，整篇文章內容要幾扭曲有幾扭曲，確係令人「嘆為觀止」呀！

所謂例子 可信度為「零」

到底《生果報》今日呢篇文引用咗乜嘢「例子」呢？首先，係「自由亞洲電台」有關「黑保安」嘅報道。呢個電台係根據1994年通過嘅美國《國際廣播法案》成立，擺到明獲美國政府設立同資助，內容經常引發爭議之外，多次被批評為煽動中國國內分離主義。剩係睇呢個電台嘅背景，大家都知道所有內容都涉及政治考慮。佢係新聞機構？唔好玩啦！

至於第二個例子，就係話台灣方面嘅黑幫組織獲得內地政府資助，包括台灣江湖大佬「白狼」張安樂同埋竹聯幫都獲得資助「活動費」云云。囍雨好奇，到底呢個所謂消息係喺邊度嚟架呢？上網查一查，原來係由主張「台獨」嘅政黨民進黨立委率先爆出嚟，其後台灣檢察單位介入調查，到而家仍然未有最終結論。拎一個未有結論嘅「案件」作為證明，到底係乜玩法？

冇嘢可justify誣衊CY「涉黑」

古德明引用一啲未能百分百證實準確嘅例子，直接當係真有其事咁寫，本身已經非常有問題；而就當作者引用嘅內容全部真確都好啦，咁唔通就可以justify某個時事評論員誣衊CY同黑社會有關呢個做法係啱咩？唔可能囉！嗱，都係嗰句，如果敢係認定CY「涉黑」，唔該先拿出證據來，否則一切都係廢話，更加可能涉及誹謗同人格謀殺添，認真不該囉！

《生果報》要將黑社會同中央政府／建制派拉上關係，呢個明顯係出於政治需要，但只要睇返其他媒體報道，即刻就可以知道中央反黑絕不手軟。遠嘅唔多講，剩係講廣東省，廣東警方舊年就成功摧毀涉黑犯罪集團130個以上，當中深圳警方一宗反黑的案例更是成績斐然，曾經喺一次掃黑行動裡面拘捕140幾人，並且凍結800幾萬人民幣涉案資金，而且呢啲更只係內地成功「反黑」嘅冰山一角！

日日屈CY 《生果報》自打嘴巴？

記得當日CY宣布唔會競逐連任特首，《生果報》立刻如獲至寶咁，一時又話CY得唔到中央信任，大勢已去、一時又話CY冇晒政治能量，從今以後可以唔使理佢云云。老實講，如果CY真係《生果報》講到咁無謂，咁點解佢哋隔幾日就要抽啲嘢出嚟搞CY呢？今日一篇UGL、聽日一篇「涉黑」，全部都冇事實根據、斷章取義，甚至係捩橫折曲嘅，若然《生果報》真心覺得CY「冇能量」，唔該佢哋就咪再死咬唔放，專心做好新聞好過啦。

圖片來源：網上圖片