2014年本港爆發歷時79日的「違法佔領」，到目前為止僅有九人被檢控，當中包括發起人戴耀廷等人；有傳媒揭發，作為「佔中十死士」之一嘅立法會議員邵家臻，已經「悄悄地」收咗「守護公義基金」（下稱「基金」）唔少錢，佢本人回應係用啲錢嚟「打官司」。廣男覺得件事相當有可疑，乜邵家臻唔係話過要「勇於承擔法律後果」嘅咩？而家收咁多錢想用打官司，係咪準備「走數」，想打官司打甩晒啲控罪先？

公民抗命 既畏且懼

老實講，盲反派班人借「普選」之名搞違法行動，嚴重影響其他市民生活、生計，本身已經令人難以接受架喇；而家「佔領九疑犯」中有幾個已經講明將會「走數」唔認罪，行為可謂極度無恥。「九疑犯」之一嘅邵家臻，當日係威係勢自稱「佔中死士」，佢自己亦都講過「抗命者應勇於承擔法律後果，以示對法治的尊重」，但家陣佢收晒「基金」錢準備打官司，咁到底係想點呢？係唔係應該同公眾，包括畀你班人呃出嚟犯法佔領嘅人交代一下呢？

另一個問題，就係呢個所謂「守護公義」嘅基金開初成立嘅時候講到明係幫班被DQ嘅前立法會議員打官司，但家陣啲錢竟然畀咗「冇被DQ」嘅邵家臻去用，到底佢有冇問過當日捐錢畀佢哋嘅市民同唔同意咁做架？就算話個「基金」自決有權決定用途都好，但整個決策過程係點呢？夠唔夠透明呢？有冇盡力諮詢唔同持份者意見呢？肯定冇囉，黑箱作業！ 

給錢違法者是守護公義？

一個聲稱要「守護公義」嘅基金，竟然畀錢一班擺明犯咗法、破壞公義嘅人打官司，單係聽落已經覺得好可笑。仲有喎，而家動用筆基金嘅人，竟然係一班「走數」、反口憂舌、厚顏無恥、欺騙市民、煽惑年輕人上街，自己就拎錢打官司嘅卑鄙政客，試問「公義」呢兩個字喺呢班人身上又如何彰顯呢？作為香港市民，希望大家都見親呢筆人都一定要「好聲好氣」咁繼續追問佢哋：點解當初講到「公民抗命」理念咁崇高又話要承擔罪責，而家竟然當住700萬市民面「走數」，呃晒全港市民呢？

原圖：Takungpao