講「融入國家發展大局」，好容易畀人上綱上線話要「趕香港人返內地」。查實對於呢種說法，囍雨一直不以為然；老老實實，喺今時今日嘅香港，如果真係唔想返內地發展嘅，又點可以迫到你去吖，咪玩啦。尋日朝早，國務院港澳辦就公布咗一系列便利港、澳、台人士嘅措施，喺內地生活同工作嘅香港人，只要成功申請到居住證，福利同待遇同內地居民就基本睇齊；囍雨知道，班「港獨」派、本土派對呢啲未必有興趣架，不過你冇興趣啫，其實又唔代表人人都冇興趣囉。

已有幾十萬港人在內地工作

呢篇文，唔係想詳細介紹上述安排嘅具體操作同安排係點，咁資料性嘅內容，大家有興趣自然會上網搵啦。簡單而言，香港人只要符合條件，成功申請到居住證的話，無論係工作就業、社會保障，甚至勞工福利等方面，都可以獲得更全面照顧同待遇。

有啲人睇到呢項政策嘅時候，隨即就會問：「我都唔返內地嘅，唔關我事喎！」係呀，如果你執意死守香港、唔返內地的話，呢啲政策安排又真係未必關你事嘅，不過如果講畀呢啲人知道，當佢哋喺度玩故步自封嘅時候，查實今時今日已經有接近52萬人長居廣東省（未計其他省市）、30萬港人長期喺內地工作（佔香港整體工作人口8%）、1.5萬個香港學生喺內地讀大學、每日有超過35萬香港人往返內地同香港（不少涉及經濟活動），唔知呢班人會唔會後悔「執輸」呢？

寧要空殼，拒發展機會？抵死！

唔緊要架，係都要拒「中」、抗「中」、唔肯返內地都唔緊要架，呢個係某啲人嘅個人選擇，囍雨真心覺得冇得迫，但如果可以客觀睇吓囍雨喺上面所列數據，相信唔少人會認同，返內地工作的確係個人生涯規劃嘅選項之一：點解呢幾十萬人會選擇返內地工作呢？呢幾十萬人主要係邊類員工呢？斷估大家都唔會覺得，係以低技術勞工為主啩？

正當呢頭香港有少部份「港獨」份子誓要聯同外國勢力搞亂嘅時候，另一邊廂幾十萬香港人率先睬你都傻，積極融入國家發展大局、選擇到內地工作或者定居。唔係要話鬥人多，而係想大家諗諗：班「港獨」份子對點樣搞「港獨」、點樣去管好香港，完全都冇概念可言，膠到連美國《時代雜誌》都要恥笑佢；明知係咁仲要跟住呢種人去癲，反而捨棄為香港提供大量便利措施嘅內地，咁真係唔好意思都要講句：「衰咗都冇人可憐」囉。

原圖：Takungpao