如果大家平常有留意開娛樂新聞，大概都會知道好多歌星嘅願望都係喺紅磡體育館開演唱會，可以高聲喺紅館高呼「我終於嚟到紅館開Show喇」、「山頂嘅朋友你哋好嗎？」。自從「香港民族黨」陳浩天日前去到香港外國記者會（FCC）演講，當住國際媒體面前宣揚蒼白無力嘅「港獨」理論後，廣男夠膽講，FCC同佢個會址立刻「出晒位」，以後FCC會址幾乎肯定會變成「港獨」派嘅「紅館」，一生人至少要去一次。明知結果會係咁，「反港獨」兼理性嘅香港人，係唔係要任由呢個情況發生呢？

一上FCC 平地一聲雷

盲反派班政客成日話如果唔係建制派甚至全國政協副主席梁振英係咁批評FCC同陳浩天，單嘢都未必咁多人理；但面對「港獨」呢個咁敏感而且擺明違反《基本法》嘅問題，由FCC決定安排陳浩天去演講嘅時候，就已經注定陳浩天會得到國際媒體關注。或者陳浩天自己都無諗過，原來去一次FCC就會即刻出位，「風頭」甚至會蓋過曾經聲勢一時無兩嘅「本土民主前線」前發言人梁天琦，咁陳浩天實在要「多謝」FCC搭晒台幫佢宣傳喇！

雖然FCC一直強調邀請陳浩天係因為佢係「新聞人物」，而有關安排亦係言論、新聞自由嘅體現，先唔講呢單嘢本身根本同言論同新聞自由無關，而家客觀結果就係FCC提供咗平台畀「港獨」派宣揚違法概念，仲要係當住全世界媒體宣傳果隻。可以預計得到，未來只要有敏感題目、敏感人士或者懷疑違法人士上到FCC演講，全世界媒體就會幫佢哋做「宣傳」。老老實實，呢啲咁嘅「宣傳」機會真係有錢都買唔到！廣男話，而家呢一刻，嗰班一樣傻、一樣癲嘅「港獨」份子，包括「學生獨立聯盟」陳家駒或者「學生動源」鍾翰林等「獨」派，一定會諗盡辦法去一次FCC演講，咁威威喎，唔去就笨啦！

用你個場 踩你主場

不過同歌星去紅館開Show唔同嘅地方係，一啲「港獨」派或者擺明「反中亂港」嘅政客去到FCC，基本上係用緊政府地方嚟反政府、反國家，就好似朋友邀請某人去生日派對，但原來呢個人係嚟搗動道理一樣。至於FCC，坦白講句廣男覺得佢同樣係借搭台畀「港獨」友搏出位，事關佢啲成員喺兩個月嘅會議都講過，請一啲「高姿態」嘅講者去FCC演講，可以令FCC更受注目或者提升影響力。不過，FCC而家擺明請疑似非法社團嘅召集人去演講，始終都係唔妥當，情況就等同如果佢哋喺外國，斷估都唔會請啲懷疑違法仲要破壞國家安全嘅人去演講；換句話講，FCC擺到明唔理陳浩天演講係咪搗亂香港特區或者中國，總之只求搏取全球注意，以呢啲咁嘅「嗱渣招」嚟出名，唔單只唔會獲得市民同國際認同，更加應該受唾棄同予以最強嚴重譴責。

原圖：Gov.hk、RTHK