堅持為「港獨」份子香港民族黨召集人陳浩天搭建平台宣傳分離主義嘅香港外國記者會（FCC），佢哋嘅所有所為有幾惡質，社會已有公論。今日，同樣喜歡為「港獨」份子搭建宣傳平台嘅《生果報》又玩斷章取義，話尋日開腔批評FCC「違法」嘅港澳辦主任張曉明係「屈」，又引述嗰個法律專業水平為人詬病嘅立法會法律界議員郭榮鏗言論，指FCC根本「冇違法」。好明顯，《生果報》又再無視專業操守，活生生咁演繹乜叫「作故仔」。

《生果報》又玩斷章取義

囍雨尋日聽晒張曉明嘅直播訪問，訪問中佢清晰咁講出認為FCC違法嘅原因，包括：違反《基本法》（呢點相信冇人會否認啩！），以及香港《刑事罪行條例》第9條關於「煽動意圖」嘅部份，《生果報》肯定都知道張曉明原話係點講嘅，點解唔直接引述埋出嚟呢？記住喎，你而家係指控緊張曉明「屈」FCC違法，但又唔全面引述張曉明嘅睇法，呢種手法都好卑鄙啫！

好喇，咁到底《刑事罪行條例》第9條係講咩架，最相關嗰條就係「引起憎恨或藐視女皇陛下本人、其世襲繼承人或其他繼承人，或香港政府，或女皇陛下的領土其他部分的政府，或依法成立而受女皇陛下保護的領域的政府，或激起對其離叛。」（根據《香港回歸條例》，任何法律條文出現英女皇、皇室、官方、英國政府或者國務大臣等字眼，需要解釋為：中華人民共和國中央人民政府或其他主管機關，或對香港特別行政區政府）

郭榮鏗回應準確度成疑

陳浩天同FCC有冇違法，可以咁講，違反《基本法》就肯定有架喇，但至於有冇違反帶有「罰則」嘅《刑事罪行條例》，咁就真係唔好意思喇，最終都係要由律政司去研究，而就算告上法庭亦要由法院審訊。但都係嗰一句，你要反駁張曉明嘅睇法，唔該唔好講啲唔講啲，而家講到讀法律出身嘅張曉明好似毫無依據地作出評論咁，《生果報》用心係點，唔使囍雨解釋，正常香港人都明白啦！

至於嗰個郭榮鏗其實都好好笑，首先囍雨想問，佢反駁張曉明之前，到底知唔知張曉明講過乜？講到實牙實齒「FCC根本沒有違反任何法律」，咁唔知佢對《刑事罪行條例》第9條又有咩睇法呢？查實關於呢條法例嘅引用，同樣具備律師資格嘅立法會議員何君堯，以及資深大律師胡漢清都認為，呢條法例至今仍然係適用於香港嘅，囍雨又真係想睇睇郭榮鏗同佢所屬嘅公民黨一眾大狀點睇喎，到底FCC係唔係真係冇犯法呢？

原圖：《蘋果日報》截圖