「袋住先」，係近期政圈最流行既一句說話，政府苦心婆心，講到明2017年普選方案並唔係終極方案，落實後將來仲有完善既空間，有商有量咁叫大家「袋住先」。不過，對於空想重於實際既泛民主派嚟講，就梗係唔會袋住先啦，就算普選真係唔能夠落實，佢哋都一於唔理。普選「唔袋」，咁錢呢？錢就梗係「袋住先」啦，人哥李卓人就完美示範咗咩叫「袋住先」！

李卓人大嗱嗱收咗黎智英150萬元，一直存喺自己個袋度，畀人踢爆先至過番畀工黨，無申報，又無唔知中間過程係點，仲要收完錢喺立法會幫黎智英說話，好難唔令人聯想到佢係收錢幫黎智英做嘢囉人哥佢哋平時對待其他人既要求高到不得了，而家自己收錢唔申報，引用番泛民既「批鬥邏輯」，應該要立法會用特權法調查事件，然後問責下台先啱！

廣男覺得收政治捐款唔係問題，但唔申報，然後幫捐款人喺立法會講嘢就大問題喇。如果有人做開某某公司、集團，申報咗之後先發言或者避席，起碼市民大眾會知道佢哋咩身份，點解會咁講嘢，自行判斷佢哋講法有冇問題。而家收咗錢，喺立法會幫黎智英講埋嘢但唔申報；咁搞法，收錢既泛民人士枱底收幾多錢，只要啲錢之後唔係落自己袋，都唔駛申報架喇。

今次事件反映立法會申報制度有問題，但呢個都唔係廣男最關注既地方。作為一個從政者、爭取民主既衛道之士，明明係做錯事，除咗解釋，唔係連道歉都要死撐話自己錯唔晒呀？好似梁家傑咁，就算立法會既申報機制唔查佢，都唔代表佢無錯架喎，收錢畀自己組織，真係佢講既無「實利」咩？行出嚟一副「你吹我唔脹」既咀臉，係咪律師、立法會議員、民主派人士就大晒，唔需要謙卑咁面對公眾呢？

原圖：jmc.hksyu.edu