「香港民族黨」陳浩天大搖大擺去租用特區政府物業做會址嘅香港外國記者會（FCC）宣揚「港獨」，無論係佢本人抑或FCC都受盡各方抨擊，囍雨覺得陳浩天嘅「中國殖民統治香港」同「可以唔要《基本法》」等言論除咗凸顯佢無知同埋「無料」外，佢喺演講中又公開要求英、美介入香港內部事務，除咗用心非常歹毒之外，亦充分顯示佢可能真係傻嘅。查實只要識少少歷史就知道，引外國勢力介入自身事務，從來都唔會有好結果。

要求英、美干預香港

喺演講當中，陳浩天唔止一次提到英國、美國，包括要求英國行動協助港人「抗暴」；而對於「風馬牛不相及」嘅美國，陳浩天就要求美國檢討《香港政策法》，稱要制裁果啲「踐踏人權」嘅香港官員，仲話如果美國貿易波及香港，將會產生更大影響力，對中國帶嚟「經濟打擊」喎！囍雨非常質疑，如果香港成為美國打貿易戰嘅針對對象，到底係邊個會受影響多啲呢？係香港平民百姓，定係中央政府呢？如果美國將香港定為佢打貿易戰嘅「射程範圍」，無論係香港出口以至貿易都極有可能受到影響，當香港經濟受到影響，咩人會受害？肯定係香港市民啦！陳浩天係咪想推冧中國同香港想到「人都癲」，竟然諗到叫其他國家出手「搞」香港，與其佢話自己係要「守護」香港，不如話佢想香港人陪佢一齊死仲好啦！

引入外國勢力 有好結果嗎？

另一點囍雨覺得陳浩天好天真嘅，係陳浩天「認為」外國勢力干預香港係好事，但大家只要睇下亞洲其他地方嘅例子，就知道未必係好事啦！好似菲律賓咁，係美國「引領」之下的確係急速實行民主化，但係菲律賓嘅民主「只有形式，內涵不足」，發展到今日佢嘅貪腐以至犯罪問題依然嚴重。又或者係香港啲後生仔去旅行當「返鄉下」嘅日本，喺二戰後被美國佔領的確帶嚟制度以至經濟嘅轉變，但最後發展成點呢？咪就係當佢嘅經濟實力威脅到美國果時，美國咪一樣「推冧」佢，仲要日本到而家依然可以話係美國嘅「附庸」。陳浩天想外國干預香港係佢嘅事，佢絕對唔代表香港以至中國人！

一句到尾，無論係從陳浩天「空白」嘅「港獨」論述，以至盲目要求或干預嘅膚淺政見，都證明咗佢嘅所謂「理念」，其實都係得個「空殼」，香港人如果信佢一成，真係「雙目失明」；如果信佢三成，分分鐘「下落不明」呀。

原圖：RTHK