人稱「長洲覆核王」嘅郭卓堅，就高鐵「一地兩檢」通關安排提出司法覆核，聯同「港獨」份子「青年新政」梁頌恆入稟申請臨時禁制令，要求禁止喺高鐵站劃出內地口岸區，幸好高等法院拒絕發出臨時禁制令，仲判二人要畀訟費添。步出法庭之後，有報道話郭卓堅眼泛淚光，自稱希望法庭有公義審判、「已盡力為香港人」等等，仲話自己過去多次訴訟令佢欠下約5,000萬元訟費，但「未能支付」。廣男實在非常好奇，雖然聲稱自己「為公義」啫，但訟費明明就涉及公帑，亦係防止人濫用司法覆核嘅機制，郭卓堅一輸再輸就證明佢所做唔係「公義」啦！

曾揚言「最好爭夠一億」

其實郭卓堅成日提出司法覆核又敗訴，爭落好多訟費都唔係今日嘅事，廣男覺得佢最乞人憎嘅地方，係在於佢提出司法程序，但又擺明唔承擔「後果」嘅一副壞咀臉；之前喺一宗司法覆核案法院拒絕受理之後，郭卓堅就曾經喺庭外公開表示自己「無錢畀」、「大不了宣布破產」，仲厚顏到話「最好爭夠一億登上世界紀錄大全」。言下之意，就係擺明係玩嘢同「走數」囉！

可能大家對郭卓堅敗訴、爭訟費冇太大嘅感覺，但廣男要喺度提提大家，郭卓堅每次提出司法覆核，就算佢本人申請唔到法律援助都好，每次開庭牽涉嘅各方面開支，基本上肯定都係來自屬於市民嘅公帑；而家佢爭落咁多訟費，而且擺明係唔還錢或者無錢還，仲喺度玩無賴話大不了就係破虛，即係變相叫市民幫佢找咗條濫用「司法程序」嘅數，佢有冇問題全香港人係唔係願意畀佢咁浪費公帑先！

沒有責任的「公義」？

老實講，郭卓堅入稟，一定話自己係為香港、公眾或者公眾利益，但大家仲要諗多個問題，OK，就當退一萬步佢真心覺得自己係為「公義」都好，咁係咪就代表做任何事都唔駛負責任呢？今日郭卓堅話自己為香港、為「公義」，所以就堂而皇之話自己無訟費畀；之前戴耀廷等人話違法佔領係為香港、為普選，所以就可以做出違法行為，事後仲辯稱「公民抗命」唔一定要認罪。諗下諗下，呢班政客口講「公義」，實則不負責任嘅行為，其實先係最損害法治。廣男奉勸郭卓堅，唔該唔好再濫用司法程序，耗費屬於所有香港人嘅公帑喇！

原圖：Takungpao