廉政公署尋日公佈，由已經署任副廉政專員一段時間嘅丘樹春坐正副專員；事實證明，之前由《生果報》一手炒作嗰啲乜嘢「打壓」呀、「政治理由」呀，根本全部都係流言廢話。本來，事實應該係勝於雄辯嘅，可惜呢件事嘅始作俑者仍然唔肯收手，係都要將件事同涉及前特首梁振英嘅「UGL事件」拉上關係，到底呢個已經公信力盡失嘅傳媒，係咪一日唔抽水攻擊政敵都唔安樂架呢？

繼續無理炒作「UGL事件」

《生果報》報道丘樹春坐正做副廉政專員呢件事嘅時候，劈頭就話要數返之前廉署嘅前署理執行處首長李寶蘭劈炮，並再「引述消息」指事件係同「UGL事件」有關，起因係因為李寶蘭「唔聽話」所以被梁振英同廉政專員白韞六聯手教訓喎！呢啲咁嘅抹黑，玩咗幾年仍然喺度玩，《生果報》班「偽新聞工作者」唔厭，市民都已經厭晒。其實點解大家唔聽聽當事人之一丘樹春點講呢？

丘樹春早喺2016年接受《廉署快訊》訪問時已經清楚講過，李寶蘭事件喺社會上的確引起極大反響，唔少評論仲「推斷」事件同廉署嘅調查有關，令身為接任人嘅佢亦備受質疑；丘樹春當時講得非常清楚，上述嘅負面觀感係「基於揣測」，而且「無事實根據」。

唔信、唔聽、唔理 咁都可以做「傳媒」？

梁振英解釋，《生果報》同盲反派政客「唔信」、廉政專員白韞六解釋，《生果報》同盲反派政客「唔聽」；好啦，但查實丘樹春本人兩年前已經解釋過，點解《生果報》同盲反派政客又「唔聽」呢？唔好同香港市民講，《生果報》同班盲反派政客冇睇過嗰一期《廉署快訊》呀？

講真，對於丘樹春終於坐正做副專員，社會應該開心至係；皆因副廉政專員兼執行處首長作為廉署第二把交椅，整個遴選過程可以話係「極嚴謹」，而各候選人嘅評核同任命過程，包括品格審查、表現評估，甚至處事態度等等，結果肯定只有廉署內極少數人知悉。既然係咁，《生果報》同班聲稱「爆料」嘅盲反派政客，到底憑乜嘢將件事同「UGL事件」拉上關係呢？證據呢？冇的話，咪就係抹黑兼誣衊囉！

《生果報》同盲反派，收手啦！

廉署呢個金漆招牌實在「得來不易」，《生果報》同盲反派政客呀，好心你哋唔好再將廉署擺上檯「抽水」啦！ 香港就快畀你呢班「政治先為，道理為後」嘅人「搞彎曬」喇！

圖片來源：ICAC