今年三月，區諾軒以「香港眾志」周庭「Plan B」嘅姿態參選立法會港島區補選仲贏埋，雖然好多人質疑燒過《基本法》嘅區諾軒都係「獨」派人士，但區諾軒嘅議席同埋薪津至今依然「袋袋平安」；近日，有媒體發現享受住議員薪津同營運辦事處津貼嘅區諾軒，竟然一口氣請咗七個「香港眾志」或者同「香港眾志」有關嘅人做議員助理，包括羅冠聰、黃之鋒同埋周庭等人。幾個「香港眾志」人士加埋區諾軒，咁立法會咪又變作一個「獨」竇？

「眾志」借「軒」還魂

「香港眾志」周庭之前之所以被選舉主任DQ，完全係因為「香港眾志」搞「民主自決」，即係變奏式嘅「港獨」，佢哋當中更有成員曾表明「港獨」係其中一個選項。在法理而言，擺明唔會效忠《基本法》同特區嘅政客根本冇可能參選立法會；在政治層面而言，一班擺明反政府、反中央嘅政客，大家話邊有可能畀佢哋攞住公帑去播「獨」呢？

如今區諾軒用公帑養住「香港眾志」一班核心成員，即係變相幫佢哋喺立法會「借屍還魂」，廣男一嚟好反對區諾軒嘅做法，二嚟亦都極度卑視「香港眾志」一班人攞公帑嘅行為。如果佢哋真係咁有志氣，又誓要繼續喺香港搞「自決」甚至「獨立」，咁又何必要攞屬於政府甚至市民嘅公帑呢？唔通佢哋一邊要反政府，一邊又要用政府錢咁奇怪呀？政治倫理而言，好似點都講唔通喎！

區諾軒相當有可疑

廣男就覺得，區諾軒呢個人嘅議員資格本身已經想當有可疑，既畀人踢爆過佢曾經當眾焚燒《基本法》，又試過公開演唱「港獨」歌曲《城邦會戰勝歸來》，而家仲要請埋一班「獨」友做議員助理，係咪即係想話畀人聽佢自己根本都係一個不折不扣嘅「獨」友先？老實講，「自決」、「港獨」派人士做議員助理，現行法例真係未必處理到，但區諾軒究竟係咪效忠香港特區以至《基本法》，廣男認為答案已經非常明顯喇！

原圖：RTHK