一向對「港獨」主張深惡痛絕嘅全國政協副主席梁振英早前連日發文，批評一意孤行邀請「港獨」份子、香港民族黨召集人陳浩天作午餐會主講嘉賓的香港外國記者會（FCC）；對於香港有一把不畏反對派惡言、撕地有聲咁戳破FCC謬誤嘅聲音，香港社會當然就普遍叫好，偏偏本身係資深傳媒人嘅FCC前執委Francis Moriarty，疑似為咗盲撐FCC，竟然大玩轉移視線遊戲，仲將國父孫中山先生拉埋落水，剩係睇到呢度就知佢嘅言論係幾咁無理啦！

梁振英反駁FCC言論擲地有聲

梁振英雖然係連續多日發帖，但重心其實都係離不開「言論自由有底線」，而為咗證明「言論自由有底線」呢個論點，佢連日來舉出不少外國例子同實際情況，更引用埋《基本法》二十三條嘅內容，去解釋點解喺香港宣揚「港獨」就係踰越咗法律嘅界線。梁振英更加舉例，反問FCC 會唔會邀請提倡種族主義、反猶太主義、納粹主義嘅人演講？又會唔會邀請「否定南京大屠殺」、猶太人大屠殺嘅人演講？

對於上述答案，絕大部份香港人都識答、FCC更加係心知肚明，呢啲咪就係「言論自由有底線」嘅證明囉！但好可惜，Francis Moriarty似乎就唔係咁諗喇，佢話喎，以南京大屠殺同猶太大屠殺做例子係引喻失義，因為「任何人都難以將一個20幾歲嘅『港獨』支持者出席午餐會演講，同上述兩件大屠殺去類比咁話。

FCC前執委曲解梁振英說話

睇到Francis Moriarty嘅反駁，唔好意思都要講句，呢個人真係冇資格被稱為「資深傳媒人」囉！其實從文面解釋已可知道，梁振英並唔係將陳浩天擔任FCC午餐會主講嘉賓，同兩個大屠殺類比；佢只係舉出南京大屠殺同猶太大屠殺做例子，證明任何有常理、有良知嘅機構，都唔會邀請「否定」兩次大層殺嘅人做主講嘉賓，換而言之，個比喻嘅主體唔係陳浩天本人，而係FCC嘅決定囉！好心Francis Moriarty就唔好「轉移視線」兼「語言偽術」啦！

除咗呢個謬誤之外，Francis Moriarty為咗盲撐FCC，仲無啦啦將孫中山先生拉埋落水，話記憶中以香港為基地意圖顛覆中國政府，最後成功埋嗰個就係孫中山先生，而佢估計梁振英都會支持孫中山先生當年所做嘅事喎。哈哈，真係好好笑呀，Francis Moriarty唔係以為自己「串」到梁振英呀？囍雨喺度挑戰Francis Moriarty，乜今日嘅中國，仲係當年嗰個喪權辱國、可以畀外國列強任意瓜分版圖嘅中國咩？乜今日嘅中國，仲係被迫任由外國輸入鴉片毒品荼毒國民嘅中國咩？

為撐「港獨」 FCC前執委侮辱國父

拎當年推翻清政府嘅孫中山去同今日香港班「港獨」份子去類比，除咗犯上咗比喻不倫嘅基本謬誤外，更係對中國國父嘅極大侮辱。敢問一句，孫中山先生何曾提出分裂國家嘅主張？孫中山反而講話：「為什麼要把向來統一的國家再來分裂呢？提倡中國分裂的人一定是野心家。」作為中國人，囍雨強烈要求Francis Moriarty道歉兼收回言論！盲撐FCC、盲撐「港獨」就認咗佢啦，仲扮嘢！

原圖：Francis Moriarty Facebook