港台有位節目主持人叫曾志豪，早排因為喺節目休息時段講粗口，被罰「熄咪」11日，呢個主持今日喺報章寫咗篇文，為邀請「港獨」派陳浩天嘅外國記者會（FCC）「平反」，大意係話FCC就算用「抵到爛」嘅價錢租到會址，係咪就只能夠「順從政府意願行事」，又或者係咪FCC如果不求政府資助，就有「分裂祖國」的自由。廣男對於呢種分析，只能夠用「謬論」去形容，因為FCC無論係咩情況租到政府會址，都唔應該分裂國家！

「港獨」根本就是錯！

根據曾志豪嘅「神邏輯」，質疑FCC係咪攞咗政府優惠就唔應該「搞事」咁；但實情應該係，FCC獲得香港特區政府優待，行事就有責任遵守包括《基本法》在內嘅所有香港法律，而唔應該喺度搞啲擺明會危害到國家安全、社會秩序嘅演講，無論FCC嘅租金係高定低，答案都係一樣，並唔係咩「低租金要順從政府意願行事」或者「繳交高昂市值租金就享有分裂祖國的自由」嘅問題！

本來喺香港任何組織都唔應該搞幫「港獨」份子宣傳嘅活動，而FCC喺政府地方搞「反政府」活動，情況就更古怪，所以之前全國政協副主席梁振英質疑FCC，實在有佢道理！另一個問題，就係曾志豪話陳浩天係近日政府狙擊「港獨」嘅焦點人物，FCC有充分嘅新聞理由邀請陳浩天演講；大家又要問下曾志豪，本港執法部門經常都「狙擊」唔同嘅懷疑違法人士同組織，有啲規模仲大添，包括黑社會、劫匪同色魔，咁FCC或者佢自己嘅節目係咪要訪問下呢啲人或者組織，等佢哋分享一下犯罪心得呢？

又是新聞自由？

廣男覺得曾志豪作為傳媒人，似乎佢眼中嘅新聞自由、言論自由係無限制咁嘅，將佢嘅邏輯伸延落去，咁恐怖份子係咪都有言論自由叫人犯法呢？仲有，傳媒除咗講新聞自由，其實傳媒都仲有「教育社會」嘅功能，如果傳媒可以唔顧後果任意幫懷疑違法人士同社團做宣傳，咁呢種「教壞細路」嘅新聞自由，唔好意思，廣男絕對不敢苟同！

原圖：RTHK