外國記者會（FCC）邀請「香港民族黨」陳浩天演講，引起軒然大波，廣播處長梁家榮噚日喺香港電台例會上，表明港台唔可以直播陳浩天演講，做法備受各方肯定；不過，一向打住新聞自由旗號同香港人對幹著嘅香港電台節目製作人員工會竟然發聲明，批評梁家榮「干預新聞自由」，而另一向來支持盲反派嘅記者組織「記協」就話港台「自我審查」云云。囍雨覺得呢兩個新聞工作者嘅工會都幾好笑，梁家榮作為港台總編輯，佢嘅決定正正係「編輯自主」同「新聞自由」，唔通新聞機構事必要為「反政府」、「分裂國家」宣傳，咁先叫「新聞自由」？乜嘢邏輯呀，大佬！

梁家榮決定正確

首先，囍雨要喺度讚揚梁家榮喺重要時刻作出最正確嘅決定。梁家榮作為港台總編輯，佢根據自己嘅專業、知道、經驗去做判斷，過程中冇證據有政府部門干預或者介入，咁仲唔係「編輯自主」同「新聞自由」嘅體現？老老實實，你港台工會同記者的確可以、有權質疑總編輯嘅決定，但唔該一切批評都要從專業出發，要以事論事，唔好無啦啦拉上去「新聞自由」度去無限發揮，繼續亂用「新聞自由」呢個詞，最終玩爛香港傳媒就係你呢班人喇！

其實根本港台工會嘅聲明，大家都可以睇到根據《香港電台約章》，梁家榮係總編輯，可以作最終決定，連工會自己都知呢個根本係「編輯自主」一部份，你夾硬要話梁家榮打壓「新聞自由」，咁同捩橫折曲又有咩分別呢？事實上，拒絕幫「港獨」宣傳根本同「新聞自由」無關，而係每一個奉公守法香港人嘅應有之義！如果話幫「港獨」宣傳都算係「新聞自由」，咁點解大家又唔見港台新聞部或者盲反派媒體訪問恐怖組織「伊斯蘭國」，畀機會恐怖份子去宣揚恐怖主義呀？

演講豈只新聞那麼簡單？

講返今次FCC邀請陳浩天事件，成件事本質根本係刻意搭個台畀陳浩天將「港獨」歪論由頭講到尾，唔同嘅媒體如果直播有關演講，情況同幫陳浩天宣傳「港獨」完全冇分別。當盲反派、記協或者某嘅媒體係咁講「新聞自由」、「言論自由」嘅時候，如果顧及到盲目幫陳浩天做宣傳，後果就係更多人走出嚟搞「港獨」甚至要武裝革命嘅話，咁媒體係咪都應該顧及下新聞道德先？如果媒體要幫違法行為做「間接宣傳」先叫Good嘅話，大家話對住呢啲不負責任嘅媒體，仲有咩說話好講呢 …（嘆氣）

原圖：RTHK