香港外國記者會（FCC）邀請香港民族黨召集人陳浩天做主講嘉賓呢件事，誰是誰非其實都已經好清晰，社會亦普遍認認同呢件事已經超越「言論自由」嘅界線！可惜，香港盲反派偏偏就係「不問是非，只問立場」，無啦啦走去搞聯署要求梁振英破壞言論同新聞自由；好心啦，連FCC自己都話冇受威脅，你班人衝出嚟獻醜做乜先！

FCC邀陳浩天演講非「新聞自由」

有啲道理講一次真係唔夠，一定要一講再講，否則香港班盲反派就會扮唔知死咬唔放。囍雨喺呢度再清晰咁講一次：反對FCC邀請陳浩天做演講會嘉賓，絕對唔涉及「新聞自由」或者「言論自由」。首先，FCC本身係一個記者組織，並唔係一個新聞機構，佢今次係以「主辦單位」身份邀請陳浩天發表演說，試問同「新聞自由」有咩關係？香港傳媒乜而家搵唔到陳浩天做訪問咩？傻的嗎？

至於所謂「言論自由」其實就更無稽。根據盲反派嘅神邏輯，如果邀請人分享「分裂國家」呢類違法行為嘅理念同心得都叫做得到「言論自由」，咁即係FCC都可以邀請黑社會份子講「社團理念」、邀請恐怖份子宣揚「恐怖主義」，甚至邀請性罪犯主講分享侵犯他人嘅手法同心得都可以接受啦，RIGHT？但事實上睇返FCC網站嘅資料，佢哋以往從無邀請過呢類人做午餐會主講嘉賓喎，咁即係FCC自己心裡面都知道「言論自由」非絕對，呢個世界係有「紅線」架啦！

「港獨」的「紅線」早已存在

其實，梁振英尋日同今日都有喺個人社交網站發文，指出香港《基本法》保障香港人嘅「言論自由」，但所保障嘅「言論自由」並非無邊無際，更加唔可以凌駕《基本法》二十三條裡面列明嘅「責任」，乜呢啲道理真係好難明咩？定係盲反派想乘機抽水，所以詐唔明咋？

陳浩天嘅所作所為，有冇牴觸到《基本法》中嘅「紅線」呢？答案係顯而易見嘅，喺度亦唔重複太多，至於FCC邀請陳浩天做主講嘉賓背後有咩原因，係為咗提高個會知名度，定真係「太天真太傻」，呢個就留畀大家自行判斷喇。囍雨反而想集中批評班盲反派政客同團體，包括范國威、毛孟靜、梁耀忠、許智峯，以及有份聯署嘅團體；佢哋話喎，梁振英批評FDD嘅言論屬於「赤裸打壓言論同新聞自由」，真係「唔識就畀佢嚇死、識就畀佢笑死」！

只有盲反派才有「言論自由」

赤裸？係呀，真係好赤裸，不過唔係打壓，係據理力爭呀！梁振英所有言論同批評都係公開發表，內容全部都係講道理、講法律、講法治，如果FCC感到壓力，咁都只係因為「真理壓倒歪理」，並唔係因為受到「威脅」囉！梁振英公開陳述自己意見，而且態度有節有理，點解盲反派政客唔支持，反而要去玩滅聲呢？唔通今日香港發展到只有盲反派可以發表意見，愛國愛港嘅一群就要噤若寒蟬？咁講得通咩？

原圖：RTHK