香港外國記者會（FCC）邀請香港民族黨陳浩天做午餐會主講嘉賓呢件事，仍然繼續發酵緊，FCC死撐就算唔認同、唔支持「港獨」都好，但都要畀機會陳浩天發表自己意見，理由咁牽強，喺度就唔反駁住喇。囍雨反而對嗰個承認「日日做漢奸，有需要就做漢奸」嘅民主黨創黨主席李柱銘有興趣啲，呢個人今日竟然好意思喺報紙撰文，將事件同「新聞自由」拉上關係之餘，又重提自己先後幾次擔任同類午餐會嘅主講嘉賓，藉以證明近日不斷批評FCC嘅全國政協副主席梁振英「打壓新聞自由」，啲咁九唔搭八嘅論述，就等囍雨KO佢啦！

邀陳浩天作嘉實不涉「新聞自由」

查實囍雨早兩日已經寫過，FCC邀請陳浩天呢單嘢根本就完全同「新聞自由」無關！大家細心諗諗，首先，FCC只係一個「記者協會」，並唔係傳媒機構；其次，今次FCC係以「主辦單位」身份邀請陳浩天做午餐會主講嘉賓，代表FCC並唔係「採訪」呢次活動，而係「主辦」呢次活動。而家社會上下，包括梁振英同特首林鄭月娥批評、不滿嘅，係FCC主動邀請陳浩天做「活動嘉賓」，變相為「港獨」份子搭建「宣獨」平台吖嘛，關「新聞自由」咩事呢？乜而家有人阻止／阻撓呢單消息曝光，又或者要「懲罰」報道呢單新聞嘅人咩？咪玩啦！

釐清事件不涉「新聞自由」之後，大家應該明白李柱銘整篇文章嘅立論係完全站唔住腳嘅；至於佢喺文章重提自己先後多次擔任FCC午餐會嘅主講嘉賓，呢樣其實正正反映咗，冇人要求FCC只可以邀請支持政府嘅主講嘉賓，呢一點梁振英尋日喺自己社交網站亦講得非常清楚，社會以往對FCC邀請乜嘢政治光譜嘅人去主講，一向都冇異議，甚至可以用「支持」去形容。

陳浩天非一般反對派 「港獨」紅線早存在

但係，今次事件性質明顯唔同，正如梁振英所講，陳浩天絕對唔係普通反對派人士，佢唔係「反政府」咁簡單，而係要「推翻政府」、主張將香港由中國版圖分裂出去，仲講明會用包括暴力同流血嘅手法去達成目的添，李柱銘同FCC真係睇唔到分別所在？至於李柱銘喺文章度話，香港「新聞自由」被亂劃「紅線」，呢個說法就更加不值一哂，「港獨」嗰一條「紅線」一直存在，只係盲反派中人無視佢、踐踏佢，撫心自問，明知搞「港獨」一定涉及暴力、流血、生靈塗炭，咁有「紅線」存在又有乜嘢問題？

早一排有一批英國檔案被解密，顯示港英年代嘅政壇紅人鄧蓮如喺1992年，即係香港回歸前五年，對時任英國首相馬卓安話，李柱銘嘅策略係以中國政體可能出現改變為前提，甚至可能會去諗「香港獨立」係選項之一。從李柱銘今日力撐陳浩天嚟睇，鄧蓮如當年嘅分析，準確度似乎相當高囉。

原圖：RTHK