近日社會集中討論香港外國記者會，疑似搭建平台畀「港獨」組織宣揚分裂中國國土理念呢件事。對此，囍雨尋日都講咗好多，今日反而想講講一單冇乜人注意嘅法庭新聞；話說舊年年底，港獨組織「學生動源」嘅前成員劉康帶住枝氣槍前往立法會，期間被警方截獲，事後仲被正式檢控。單案結果係點暫時未知，其實亦一啲都唔重要，最重要係香港必須知道，「港獨」早已經唔係「講吓咁簡單」。

「港獨」份子疑帶氣槍集會

劉康單嘢由於已經上咗法庭，囍雨為免犯法當然唔會講太多，唯一可以講係從庭上播放片段可見，劉康本人被警察截停時一度情緒激動，而被搜出氣槍時就聲稱：「我去影相囉，枝槍我鍾意帶埋去唔得呀？」劉康被截查時，立法會外面正舉行反對立法會修改《議事規則》嘅集會，亦有人喺立法會大樓外添美道紮營留守。

作為「港獨」份子，劉康做乜要帶住枝氣槍周街走真係只有佢自己先知，佢咁做有冇罪呢？呢個亦要等法官去判斷，囍雨想講嘅係唔單係劉康本人，舉出呢個例子最主要係想帶出，今次其實已經唔係首次有「港獨」份子被指攜帶違禁品而被檢控；好似喺2014年「違法佔領」期間，警方喺大角嘴搗破一個疑似武器工場，即場撿獲三枝超出兩焦耳嘅改裝氣槍、32個木盾牌同一批製造盾牌的材料及配件，而當被警員帶走時，其中一名「港獨」份子就多次大叫：「旺角加油！金鐘加油！革命必勝！城邦會戰勝歸來！」

「旺暴」期間武器處處

仲有仲有，講到暴力同武器，點可以唔提由「港獨」組織本土民主前線發起嘅「旺角暴動」？根據法官判詞，「旺角暴動」期間，人群中有多人持有武器，包括木棍,、石頭、玻璃樽同其他雜物，而呈堂影片亦可以清楚睇到，參與暴動、企喺前排嘅群眾好多都持有自製盾牌，亦有人戴上頭盔，甚至有人即場著盔甲同手持長棒等等。

囍雨不斷講咁多「歷史」用意係咩呢？其實好簡單，當一眾「港獨」組織，包括「本土民主前線」、「學生動源」，甚至係最近好紅嗰個「香港民族黨」都早已經表明，支持用一切手法去達成「港獨」目的，而「港獨」份子亦早已經有實質行動，包括發起／參與暴動、派傳宣「港獨」單張、入學校做講座、四圍排橫額宣傳「港獨」等等，唔通我哋真係仲可以話呢班人只係「講吓咁簡單」？禁止「港獨」政黨運作，乜真係單單同「言論自由」或者「新聞自由」有關咩？唔好玩啦！

原圖：Takungpao