香港外國記者會計劃舉行午餐會，邀請講到明搞「港獨」嘅香港民族黨召集人陳浩天做演講嘉賓，消息傳出口引起全城嘩然，繼外交部駐港特派員公署後，全國政協副主席梁振英，以及特首林鄭月娥都相繼發聲批評外國記者會嘅安排，其中林太講到明對此感到非常可惜同遺憾。陳浩天受盡千夫所指，不過搞「港獨」搞到失常嘅佢竟然仲話，林太嘅言論係「干預新聞自由」同「影響香港國際形象」喎。呢，呢啲咪就係典型博人唔識，吹水唔抹嘴囉！

事件無關「新聞自由」

首先，囍雨喺呢度必須講清楚，批評外國記者會邀請陳浩天做演講嘉賓呢件事，絕對絕對唔係乜嘢「新聞自由」。今次係一個外國記者組織，以主辦單位身份邀請一個「港獨」份子去宣揚「港獨」理念，事件中外國記者會並唔係新聞機構，政府亦唔係禁止佢哋採訪或者報道事件，咁試問又同「新聞自由」有咩關係？陳浩天唔好見到「記者」兩個字就覺得一定同「新聞自由」有關先得架！

計囍雨話，呢件事不單止不涉及陳浩天所講嘅「干預新聞自由」，相反更加係凸顯咗香港嘅「新聞自由」同透明度。香港市民試諗真一下，如果香港真係冇「新聞自由」的話，乜呢件事有可能曝光咩？唔好玩啦！陳浩天仲好意思話會「影響香港國際形象」喎，查實最影響香港國際形象嘅係佢呢類無賴就真啦。

西方媒體拒宣恐怖主義

講開「新聞自由」，囍雨其實都好堅持香港要有「新聞自由」，但與此同時亦好希望社會諗清楚「新聞自由」嘅真義係乜。舉一個例，幾年前極端恐怖組織伊斯蘭國成日將啲斬首處決外國人質嘅影片擺上網，但真係透過傳媒睇到呢啲片段嘅人其實並唔多，原因係絕大多數西方媒體，都冇將呢啲血腥畫面公開播出，頂多係播出斬首前嘅靜止影像。

西方國家媒體有冇「新聞自由」呢？相信唔會有人話冇，但大家都肯自律而為，理由其實簡單不過：唔想幫伊斯蘭國宣傳、唔想有人仿效恐怖份子行動、唔想播出令人不安嘅畫面、唔想引起社會恐慌、唔想影響國家同社會安全。喺播放伊斯蘭國影片上面，西方傳媒嘅決定明顯係一種「自我審查」，但人哋對此唔會持負面睇法，因為真正知道「新聞自由」真義嘅都會知道，呢種係道德同操守所在。

「港獨」必然涉暴力和流血

返到去香港民族黨同「港獨」份子嘅相關事宜上面，喺香港搞分裂國家活動，最終結局必定係暴力、流血，甚至生靈塗炭，香港傳媒報道呢類新聞嘅時候，係唔係都應該「停一停、諗一諗」；至少，唔好陳浩天呢啲傻人講乜就報乜，佢話人哋「政治打壓」又報、佢話人「干預新聞自由」又照報，咁其實都好反智啫，大家係唔係應該了解清楚事情本質先去「報道」呢？

原圖：RTHK