泛民一干人等接受壹傳媒老闆黎智英政治捐獻，各有說法，其中公民黨黨魁梁家傑更加辯稱自己只係幫真普聯收錢，自己無直接或者間接利益，所以唔駛申報喎！傑哥，你自己都係真普聯成員，收錢畀自己個組織搞政治宣傳，咁都叫無利益，咁乜嘢先叫利益呀？

其實，梁家傑既講法講得相當聰明，亦盡顯佢資深大律師「死都拗翻生」既功力。仔細留意佢既說話，佢係話自己「無收過一仙」、「無任何實際直接或間接『金錢』利益」，換句話講，即係無收過任何金錢上既利益。但咁樣講法，唔代表佢係「無私利」喎，因為收錢畀自己所屬既政治聯盟，佢有既就算唔係金錢利益，都一定有政治利益！

好簡單，佢收咗錢畀真普聯，真普聯多咗三十萬元，即係佢所屬既普選聯盟多咗宣傳費，真普聯用啲錢宣揚普選理念既時候，梁家傑又可能會亮相，爭取到既明顯係政治利益。

調番轉講，如果真普聯少咗三十萬元，對梁家傑有冇負面影響呢？答案係有既，至少個政治平台少咗錢做嘢先啦，梁家傑作為立法會議員，曝光或者宣揚普選理念既資源都少咗，對一位政治人物嚟講已經係嚴重既損失啦！

仲有呀，梁家傑成日話呢次收錢同自己立法會議員既身份無關，唉，咪當人三歲細路仔先得架，如果你唔係立法會議員、係公民黨既黨魁，鬼搵你入去真普聯咩？咪玩啦，傑哥！

攞出銀行帳戶資料，梁家傑證明自己啲錢過番畀真普聯係無利益，只係幌子一個，雖然無錢落袋，但事實上落咗袋既係政治利益！如果今日議員一句錢唔係落自己袋就可以唔駛申報，乜都得，咁申報制度會唔會形同虛設呢？呢個問題真係要請教下傑哥！

原圖：網絡圖片