明年區議會選舉嘅選區劃界建議早前已經公布，盲反派一如既往，一聽到選管會嘅劃界建議立刻反射性大叫「政治打壓」，一時又話選管會玩針對、一時又話有政治考慮，真係聽到囍雨耳都側埋。其實大家只要睇返選管理嘅建議，即時就可以發現受影響嘅絕對唔只盲反派，唔少建制派區議員嘅選區都被劃走，唔知嗰班大叫「政治打壓」嘅盲反派對呢個現象有咩回應呢？

選管會建議一視同仁

盲反派有咩區議員受影響，大家自己上網亦可以搵到，相反建制派現任區議員受到幾大影響呢，似乎就冇乜人講囉。其實早已經有報章統計過，以今次選管會建議嘅選區劃界，對比2015年區議會嘅選舉安排，其實就可以發現盲反派同建制派都分別有約三成議席受到影響，就連嗰一份一向偏幫盲反派嘅報章都話：「單從數字所見，未見政府特別針對泛民或建制」。

好喇，數字上冇見到唔公道，咁到底有咩建制派區議員受到影響呢？先講相對比較出名嘅先，現任立法會議員周浩鼎、陳恒鑌，以及新鮮熱辣擊敗喺九龍西補選裡面擊敗盲反派代表、前立法會議員姚松炎嘅鄭泳舜；眾所周知，地區樁腳同區議會議席對上述呢幾位建制派新星都非常重要，甚至可以大膽咁講，如果佢幾個真係失落區議會議席的話（除非係自己唔選），可唔可以繼續做立法會議員都成問題。而家根據選管會建制，佢三個嘅選區都被重新劃界喎，如果選管會真係有「政治考慮」或者「政治打壓」的話，咁對上述情況又點解釋呢？

建議縱不完善 亦不代表是打壓

除咗上述三個建制派新星外，唔少建制派區議員其實都受到影響，好似元朗區議員李月民咁，佢所屬嘅天水圍嘉湖北選區亦被重劃，客觀效果亦係令到一班原本佢服務開嘅選民被劃走。仲有仲有，喺今次重新劃區嘅建議中，長洲由南北兩個選區合併為一個，係呀，係二合一呀，而且現時兩個現任區議員都肯定唔係盲反派代表囉，唔知盲反派班人對此有咩解釋呢？唔通又係「政治打壓」，想減少建制派議席？

大家睇到咁多例子，相信已經知道話選管會「政治打壓」完全係信口雌黃式指控，呢種說法無論係數字上，定係實際情況上都係站唔住腳。或者今次選管會嘅建議係有值得商榷，甚至係修訂嘅地方，但咁樣絕對唔代表有「政治打壓」；家陣選管會對選區劃界都未有定案，只係初步建議啫，盲反派唔需要即時提升到去「打壓」層次吖，定還是盲反派自己「驚輸」，所以早早出定口術「博同情」呀？

原圖：Takungpao