政府考慮取締擺明搞「港獨」嘅社團「香港民族黨」，「民族黨」近日大玩「拖字訣」，一時要求政府畀更多時間佢回應，一時又問執法部門攞一啲可以話同佢單嘢無乜大關係嘅資料，被各界人士狠批佢「揼波鐘」。今日，廣男睇到「民族黨」陳浩天接受傳媒訪問，繼續為自己「播獨」言行塗脂抹粉，聲稱自己所做嘅事同其他政黨「無異」，仲話如果咁都叫犯法，咁其他政黨都一樣喎。廣男委實覺得奇怪，乜其他政黨有話要「港獨」同武裝革命咩？有話不惜用盡一切方法，包括暴力同流血都要搞「港獨」咩？唔好玩啦，陳浩天！

誓搞「港獨」 於普通政黨大不同

事情係咁嘅，當陳浩天喺訪問中被問到「港獨」係咪得個講字，又或者有冇行動過時，陳浩天就聲稱佢做嘅嘢同其他政黨「無異」，都係上電台節目、參選等等，仲話如果佢咁都叫犯法，「其他政黨都一樣」。對於呢種謬論，廣男必須立即踢爆；首先，乜其他政黨有話要「港獨」同「武裝革命」咩？又有話要同其他分離主義者合流去「圍堵中國」咩？乜佢哋有學校門口派傳單宣傳「港獨」兼流血革命咩？天哥，唔好當全香港人傻架啦。

事實上，「民族黨」同其他政黨最大嘅分別，就係其他政黨諸如主流盲反派政黨，就算係反對政府都好，基本上都唔會話要搞「港獨」，唔會話要喺香港搞「武裝革命」，更加唔會走去台灣話台灣、香港都要獨立，要一齊「圍堵中國」等等；「民族黨」擺明就係要分裂自己國家，危害領土完整，陳浩天唔係唔明自己「有咩犯法」，而係唔承認自己言行違法至真！

校園「播獨」 罪加一等

至於「民族黨」或陳浩天將「港獨」歪風帶到校園嘅問題，陳浩天辯稱政治入校園係「政府做先」，自己只係將另一角度告知學生；廣男就覺得，「將另一角度告知學生」呢個講法，大有可以斟酌嘅地方，例如政府、學校教導學生要守法、做良好公民，如果有罪犯叫啲學生去用暴力、犯法，其實都只係「將另一角度告知學生」，咁樣係咪冇問題呢？相信明眼人諗一諗，就會知道陳浩天所講嘅根本冇道理！

對於「民族黨」呢個社團最後會唔會被取締，暫時仲係不得而知；但廣男可以肯定，如果任由「民族黨」、陳浩天胡作非為，成個社會都可能要付出沉重代價。 

原圖：Takungpao