前立法會議員梁國雄（長毛）因為拒絕、忽略誓言被DQ，早前拒絕接納立法會行管會歸還預支營運資金嘅要求，終於被行管會入稟法庭，追討近300萬元嘅薪金、預先開支本金同利息，多名立法會議員不約而同表示行管會嘅做法合理。長毛方面，一如既往啦，乜都話係政治打壓，當日明明係佢自己拒絕行管會嘅還款方案在先，所以先會衍生出今日嘅官司，但長毛一於唔理，死口話行管會今次處理方式，同之前處理另外幾個被DQ嘅議員唔同。對於長毛嘅說法，囍雨真心覺得好荒謬，既然都已經會交上法庭喇，無啦啦又講咩「政治打壓」？咪玩啦！

行管會欲網開一面 長毛拒絕還款

老實講，行管會對對名DQ議員真係已經仁至義盡，行管會今年四月畀梁國雄等人嘅建議，只係要求佢哋交還19萬元至31萬元不等嘅「預支營運資金」，而劉小麗、姚松炎同羅冠聰亦已「好順攤」咁還晒錢，剩番梁國雄死都唔肯還。大家要諗下，當日行管會只係要求梁國雄交還可以話係「未用」或者「預支咗」嘅公帑，即係攞番屬於香港市民嘅錢，到底有咩問題？梁國雄自己拒絕，咁行管會當然執正嚟做，好正常喎！

根據傳媒報道，梁國雄自己亦親口講過，立法會要議員交還未用嘅公帑合理，但自己仲上訴緊，有可能拎得返個議席，因此堅持要行管會等佢嗰單上訴議席嘅案件完結先至去追討。是咁的，梁國雄上訴議席會唔會成功，囍雨不得而知，另一方面，行管會係唔係應該等到佢上訴議席單案有終極裁決先至追數，其實亦眾說紛紜；而家重點係，如果大家喺呢個法律觀點上有爭拗，咁咪喺法庭解決囉，關「政治打壓」乜嘢事呢？由法庭裁決應唔應該追長毛錢都係「政治打壓」？傻的嗎？

涉及公帑運用 必須司法裁決

講真吖，香港作為司法獨立嘅法治社會，將紛爭交上法庭根本就係最公道同文明嘅做法，尤其係今次事件涉及公帑運用，更加唔可能不了了之啦。既然長毛堅持唔使還、行管會又覺得佢應該還，咁交上法庭由法官裁決，似乎就係唯一解決問題嘅方法，長毛以往一直將「法治」、「司法獨立」等等掛喺口邊，自己亦曾經提過唔少次司法覆核，理應好相信呢套香港嘅司法制度至係吖，因咩而家又老屈行管會「政治打壓」佢呢？囍雨喺呢度強烈要求長毛收返「政治打壓」等涉嫌誹謗嘅言論，還香港法院一個清白！

原圖：RTHK