「記協」經常被指立場偏頗，相信大家看罷佢近日所發表嘅一份所謂《二零一八香港言論自由年報》後，偏幫盲反派嘅角色更加鮮明，而一直身為盲反派媒體頭號人物嘅《蘋果日報》，更將報告內容加以渲染誇大扭曲，今日佢哋有報道就話，支持建制派嘅網媒湧現，長遠而言加深社會撕裂，但只要細心研究過報告內學者嘅分析，會發現《蘋果日報》擺明就係想誤導讀者！再講，如果講撕裂社會，喺香港呢個地方，捨《蘋果日報》其誰呢？

歪曲報告 諉過於建制

《蘋果日報》今日有篇報道題為《建制網媒湧現 製造輿論撕裂社會》，內文引述「記協」份報告裡面所引述嘅學者稱，「建制網媒着力於政治宣傳而非報道事實，長遠而言會加深社會撕裂」；囍雨抱住一份求真嘅精神，即管睇下份「記協」份報告點寫法啦，但事實人哋原來係寫「當雙方陣營都傾向把事件極速兩極二分化及政治化，會摧毀討論空間 … 長遠而言令社會撕裂」。換句話說，份報告係話「兩邊」、即係盲反派媒體都有份，《蘋果日報》咁樣歪曲份報告，就算唔係作新聞，但都肯定係同事實有偏差囉！唔知咁又算唔算「撕裂社會」呢？

《蘋果》乃社會撕裂元兇？

囍雨就覺得，撇除建制媒體或者「非盲反派」網媒都係以事論事為主，如果真係要講到社會撕裂，《蘋果日報》根本就應該記首功，係主流媒體入面撕裂社會嘅No.1至真。大家諗下呢幾年發生咩事，幾年前違法佔領發起人戴耀廷話要違法「佔中」，《蘋果日報》等媒體就成日幫違法行為做免費宣傳；又或者近期旺角暴動被告梁天琦等人被判監，《蘋果日報》又大字標題引述大狀講法話梁天琦「勇於承擔 不放棄香港」，成份《蘋果日報》好似專幫違法人士開脫、搵借口咁，仲有仲有，每年七一，《蘋果日報》都例牌「吹雞」叫市民上街盲反，講到「社會撕裂」，大家要真心「多謝」《蘋果日報》就真。

今次《蘋果日報》配合「記協」營造新聞自由受損、「責任在於建制派」嘅感覺，講到底佢哋呢份報告都係為政治服務啫。但囍雨就覺得《蘋果日報》作為曾經盛極一時嘅「民主大報」，佢哋「跌紙」、「廣告少咗」係咪應該諗下佢哋事事炒作、誇大嘅作風係咪已經被讀者或者廣告商所厭棄呢？唔係得個講字架，事實上《蘋果日報》因公司壹傳媒業績近年不斷惡化，截至今年3月底為止嘅財政年度勁蝕4.76億港紙，虧損較去年同期擴大21%；另外，期內印刷業務（主要係《蘋果日報》啦！）虧損擴至4.35億元，至於壹傳媒一直揚言重點開發嘅數碼業務更加虧損4,463.9萬元，按年上升咗35倍！另外呀，壹傳媒早前業績報告已經披露，佢哋已經將帳面值總額6.64億元嘅台灣物業抵押畀多間銀行去換取融資，業績差到咁，話佢受到唾棄，相信冇人反對啦！

為政治扭曲新聞內容證明不得民心

鬧人嘅時候，都睇睇自己表現成點至得。有時大家係唔係要諗諗，點解得十幾到幾十人嘅網媒可以發揮到影響力，而勢力「龐大」、率先撕裂香港嘅壹傳媒會江河日下呢？其實，《蘋果日報》以至「記協」劍指嘅建制網媒，夾夾埋埋都有過百萬粉絲，佢哋所代表嘅都係社會意見，都係市民嘅聲音。《蘋果日報》與其話人撕裂社會，不如諗下係咪自己太激、太鍾意分化社會，搞到被佢哋批評、支持建制嘅網媒被迫要企出反駁佢哋種種謬論仲好啦！識得話人唔識話自己，其實真係好好笑！　

原圖：《蘋果日報》網站截圖