假設有一個違法組織，近年已經沉寂唔少，喺現實世界同網上都已經不算活躍，咁當政府同執法部門有足夠證據嘅時候，大家認為需唔需要取締呢？相信絕大部份有少少常識嘅人都會反問：「兩者有咩關係？」係囉，兩者正正係無關係，偏偏囍雨近日睇網媒新聞，見到一篇報道話香港民族黨「沉寂逾1年突面臨取締」、「網上『零搜尋』多時」等等，一睇就知係質疑政府計劃取締民族黨係別有內情，但事實同道理又係唔係咁呢？

沉寂又如何？違法就要取締

講明先，囍雨唔係想質疑呢個網媒報道嘅真確性，的確，好似民族黨呢類受盡千夫所指、高舉違法主張嘅社團，一早就應該受到社會唾棄，佢嘅沉寂、佢嘅「零搜尋」，根本係意料之中，冇乜咁值得懷疑。囍雨認為值得商榷嘅係，政府去唔去取締一個違法組織，同呢個違法組織活唔活躍，其實真係冇直接關係，只要呢個組織／社團本質係違反香港法例，而政府研究過認為有足夠證據「做嘢」，咁就自己會去做架啦，關個社團活唔活躍乜嘢事先？

再者，香港係法治之區，政府要取締一個佢相係係違法嘅社團，前提就係搵到足夠證據同研究箇中法理依據，呢個網媒嘅報道都有講啦，有份跟進取締民族黨呢件事嘅助理社團主任，足足整理咗874頁嘅鐵證，證明民族黨「主張香港獨立」、「不惜運用武力達致目的」、「煽動仇恨及歧視內地人」，最終得出民族黨「危害國家安全」、「對公共安全及公共秩序有害」、「危害他人權利和自由」嘅結論。

性質違法就應取締　這就是法治

老老實實，剩係整理上述呢堆資料同諮詢法律意見，相信亦已經用去特區政府唔少時間；所謂問題都係嗰個，就算民族黨近一年真係沉寂都好，只要佢性質係違反香港法律，咁都係應該取締架喎，到底有咩咁值得大驚小怪呢？真心想作出呢個報道嘅網媒清楚咁解答在下。

講到底，呢個網媒似乎都係想凸顯民族黨對香港已經冇威脅，亦都冇市場，特區政府呢一刻計劃取締佢，背後一定有不可告人嘅秘密等等。但係囍雨喺度想同大家講一句：一個違法社團，即使已經沉寂，亦絕對唔代表已經冇威脅，更加唔代表唔需要取締，只要呢個社團一日存在，佢就有可能繼續用盡不同方法去搞風搞雨，尤其係民族黨呢類講明「不惜運用武力」嘅社團，根本就係香港社會嘅一個計時炸彈，此時不取締，唔通真係要等佢壯大同活躍先去「做嘢」？

原圖：RTHK