政府有意根據《社團條例》取締民族黨消息傳出後，香港立刻群魔亂舞，一眾牛鬼蛇神全部蒲頭，除咗拎出種種歪理悖論去聲援民族黨外，部份人更加出到「危言聳聽」呢招，務求將取締民族黨嘅計劃全面妖魔化。近日，香港人權監察總幹事羅沃啟接受傳媒訪問，除咗繼續將民族黨嘅惡行淡化為「言論層面」外，更卑劣嘅係話香港警察依法執行《社團條例》等同重組港英殖民地年代嘅政治部，唔使問阿貴都知佢又係用一味靠嚇呢一招去煽動市民情緒啦！

羅沃啟比喻不倫 抹黑警察

先旨聲明，以下評論完全建基於傳媒報道，如果內容有不實之處，麻煩羅沃啟自行向涉事傳媒追究責任。據報道，羅沃啟認為，警方調查（民族黨）後，應該將案件交畀律政署（司），然後由後者向法院申請禁制令先至係正確法做；佢又話喎，現時警察雖然冇咗「政治部」，但警察若果覺得整個程序全操於自己手上只係「履行職責」，而且樂於執行，就會形成一個實際上的「政治部」云云。

喺反駁羅沃啟之前，就等囍雨同各位讀者上一堂歷史堂，解釋吓乜叫「政治部」。簡單而言，港英年代香港警察嘅政治部門，架構上雖然隸屬警務處，但實際上係直接由特務情報機關「英國軍情五處」指揮；當年嘅「政治部」作為英國對香港管治嘅直接行動組，實際上係扮演住「秘密警察」角色，當年更加喺港島域多利道建立被人稱為「白屋」監獄，專門關押「政治犯」，只要政治部覺得某人有可疑，隨時就可以將有關人士拘禁，甚至係拷問。

香港司法獨立 警察並非隻手遮天

返到嚟今日，囍雨真心想問到底今日香港警察有邊一度似當日港英年代嘅政治部？講唔出嘅，佢就係抹黑同誹謗！冇錯，法例的確係賦予警方執行《社團條例》嘅「權力」，但其實亦係「責任」，警方唔執行相關法例嘅要求先至係公義所在，唔執行反而就係「瀆職」。呢個咁簡單嘅道理，羅沃啟真係唔明？

再者，根據《社團條例》，被指控嘅社團係有上訴機制嘅，而即使上訴失敗都好，涉事社團仍然可以向高等法院申請司法覆核，嘗試去推翻保安局同警方嘅決定；香港法院獨立運作，司法獨立受到國際肯定，正因有呢個機制喺度，香港警察今日執行《社團條例》就絕對唔係隻手遮天，更加唔可以同港英年代政治部去類比。

發聲支持取締民族黨

講到呢度，相信大家都會認同羅沃啟其實又係用返「靠嚇」同「老屈」等招數，嘗試為民族黨開脫同騙取「道德高地」。到今日仍然有人話，民族黨同班「港獨」份子只係「講吓」，唔使咁認真應付，但情況唔係咁；囍雨夠膽話，搞「港獨」，就一定涉及暴力，「旺角暴動」就係最好例子，如果大家唔想香港踏上流血暴力嘅不歸路，請大家都企出嚟發聲，支持取締民族黨同所有「港獨」組織！

原圖：香港人權監察Facebook專頁