呢幾日書展舉行，大家都會見到好多有關於書展嘅新聞，廣男覺得今年書展比較特別嘅地方，係在於向來較為平靜嘅書展，似乎都出現唔少「政治化」嘅事件，例如有人出書就畀人話係「投共」，又或者書展明明係一個比大家買下書、睇下書嘅地方，又出現啲好似「黑社會」包圍人嘅情況。今日廣男睇新聞，見到盲反派資深政客、資深大律師李柱銘都借書展活動撰文，「借題發揮」寫到社會亂象，都係拜前官員所賜；大家真係要問下李柱銘，點解盲反派成日搞事，佢又當係「義舉」，而所有責任都喺別人身上呢？

社會分化 多得了誰？

李柱銘向來鍾意撰文鬧政府以至中央駐港機構，基本上都唔係咩新聞嚟架喇，佢今日喺《蘋果日報》又有篇文，話而家香港社會分化嚴重，都係拜前特首梁振英所賜，聲稱梁振英「千方百計撕裂社會」，而治港者就趁機實現「全面管治權」，又話凡係盲反派提出嘅建議，建制派都反對到底等等。大家係咪覺得李柱銘呢番說話「怪怪的」呢？冇錯，因為佢基本上都係將啲嘢掉轉嚟講，捩橫折曲、混淆視聽。

如果講「撕裂社會」，廣男認為最大責任，肯定係喺盲反派身上。以政改為例，其實社會大部份市民都係想通過政改方案，令到香港政制行前一步，但盲反派偏偏就要漠視民意，反對政改仲要搞咗個長達79日嘅「違法佔領」出嚟；之後「港獨」爭議，明明係「港獨」派挑起而梁振英只係好心警剔，但「扭是成非」嘅政客雖然聲稱自己「反港獨」，但又矛盾地話梁振英指出「港獨」問題先係唔啱。所以如果要數「撕裂社會」，好明顯係盲反派政客先真啦。

盲反派凡事必反

至於李柱銘話盲反派提出任何建議建制派都要反對，其實道理亦應該用另一個角度睇；例如高鐵「一地兩檢」咁，明明又係大部份市民都支持，咁盲反派點解又要逆民意而行都反對呢？又或者，當社會有聲音要求盡快就《國歌法》、《侮辱公職人員罪》或者《禁蒙面法》等等立法嘅時候，盲反派點解又要反射性式反對呢？仲有，香港社會普遍反對「港獨」，咁點解盲反派又要力撐擺明違反憲法、《基本法》以至《社團條例》嘅「香港民族黨」呢？「民族黨」政綱擺明違反普通法原則同聯合國公約內容架喎，咁都要支持落去？呢個仲唔係「盲反」？

有時候，廣男都幾佩服李柱銘，因為好多嘢佢都可以用「另一角度」去演繹，或者呢啲就係佢作為資深大狀嘅技能；但係，佢哋自己成日搞事，而家反而話為國家安全、社會秩序而發聲或者執法嘅人唔啱，廣男真係要問李柱銘一句，「公道咩？！」

原圖：RTHK