「司法覆核」係市民嘅權利，呢一點唔會有人反對；不過當呢項「權利」被過度使用，隨時會變成「濫用」。講緊嘅係「長洲覆核王」郭卓堅，佢尋日又一次被法庭拒絕司法覆核申請，要支付成千萬訟費；因為多次無理要求覆核而被法院拒絕申請嘅佢，喺法院門外仍然恬不知恥咁話「破產都唔介意」。呢種人講就講得好好聽，但查實佢根本唔係為公義，而且係一個「本死無大害」嘅無賴！

郭卓堅濫用覆核有前科

可能有啲人會問：「喂，郭卓堅為公義申請司法覆核，破產都唔介意，行為好偉大，做乜鬧佢係賴皮無賴先？」大家不妨聽聽囍雨分析先下判斷好唔好？首先，郭卓堅多次無理申請覆核，絕對有往績可尋；佢舊年已經因為多次濫用法律援助制度去申請司法覆核，結果被法援署禁止申請法援搞司法覆核三年。

雖然已經被禁止申請法援去司法覆核，不過郭卓堅仍然不知收斂，繼續向法院申請司法覆核，但可以成功獲批申請嘅呢？SORRY，真係冇，而且更加多次被法官斥責「濫用司法覆核同法律程序」，包括要求特首林鄭月娥收回譴責「違法佔領」發起人戴耀庭「播獨」嘅新聞稿，以及今年四月以所謂《基本法》有爭議、針對「一地兩檢」提出司法覆核，結果亦被法官批評屬濫用司法程序。

講到明走數 破壞機制行為無賴

單係睇上述兩個例子，加上冇其他「反證」嘅情況下，已經足以證明郭卓堅係一個經常「無理覆核」嘅人；本來如果佢肯承擔責任，支付畀佢滋擾一方嘅訟費，咁都由得佢啦，不過而家情況唔係咁喎，郭卓堅講到明會破產，仲笑笑口話如果拖欠嘅訟費去到一億港紙，可以上「世界紀錄」等等，呢啲咁無恥同不負責任嘅說話都講得出，想唔話佢無賴都唔得啦！

香港法律制度下，點樣去防止濫用司法覆核機制呢？最重要係由高等法院把關，將郭卓堅等一類無聊人嘅無理申請篩走；另一個機制，就係要求無理申請覆核嘅一方支付訟費！大佬呀，司法覆核對象一定係政府或者公營機構，涉及嘅一定係公共資源，至於法院運作所使用嘅亦係公共資源，如果市民申請司法覆核係有理有據，咁呢啲公共資源當然用得其所啦，但若然相反，好似郭卓堅咁「覆核成癮」，咁就唔同講法喇，好明顯浪費緊公帑！

郭卓堅一切從「政治」出發

而家郭卓堅嘅情況就係：「係呀，我係玩嘢，不過咁又點？我冇錢架，最多咪申請破產囉，你奈得我何呀？！」係唔係聽到都覺得呢個人無賴同卑鄙先？明明自己做錯事畀法官鬧，但仍然厚住面皮要破產，呢種人明顯係「政治凌駕公義」，所作所為全部從「政治」出發；「公義」？咪玩啦，郭卓堅點會知乜嘢叫「公義」吖。

原圖：RTHK