政府保安局有計劃動用《社團條例》第八條去取締民族黨，呢個決定當然令到全香港絕大部份反對分裂國家嘅市民開心又興奮啦，但由於香港有種叫盲反派嘅特殊物種，故此即使政府呢個決定嘅方向肯定正確都好，都仍然引嚟小部份無聊人反對同批評。囍雨其實真心想知道，到底班盲反派知唔知道自己盲撐民族黨，其實係撐緊啲乜？佢哋查實又知唔知，民族黨嘅主張，其實同佢哋嘅理念係相違背架呢？

公民黨帶頭撐破壞法治

開聲撐民族黨嘅盲反派政客唔少，就以公民黨為例吖，佢哋個主席、資深大律師梁家傑同黨魁、執業大律師楊岳橋，喺保安局宣布有關決定之後，都先後發表過支持民族黨、反對保安局決定嘅言論；不過老實講，囍雨真心好懷疑，呢個成日將「法治」擺喺口邊嘅政黨其實並唔知道自己撐緊啲乜，如果話畀公民黨呢班「法律政客」知民族黨主張其實係違反法治精神，呢班人仲會唔會撐得咁過癮呢？

上網搵一搵疑似由民族黨陳浩天所寫嘅〈香港民族黨執政藍圖〉，其中一個「政綱」竟然係話要「褫奪97年起 所有雙非嬰兒的香港公民權！」，相信唔少人睇到呢項「政綱」都會「嘩一聲」；其實大家只要有少少法律常識，就會知道呢個主張係完全違反「普通法」裡面嘅不追溯原則，民族黨呢個主張，完完全全係違反香港法制同法治，枉你班公民黨律師仲可以撐佢嘅？咪玩啦！

公民黨帶頭撐違反國際公約

除咗上面呢點之外，民族黨「政綱」裡面查實仲有唔少有違法治原則，甚至違反國際公約嘅條文。好似其中一項「禁止所有學校預留學額予雙非學童」咁，雙非嬰兒喺香港出世，根據香港法例就係香港人，有權喺香港接受教育。唔畀呢類學童接受教育，即係剝奪佢哋接受正規教育嘅權利，呢項主張完全違反聯合國《兒童權利公約》！

冇錯，筆者認同，雙非嬰兒係會影響香港市民日常生活，咁所以上任特首梁振英喺上任前咪已經講明「雙非零配額」囉；公民黨呀公民黨，你班政客到底知唔知自己撐緊乜呀？ 

公民黨帶頭政治干預專業

最後，囍雨打算引多一項民族黨政綱去說明支持佢嗰班政客係幾咁無理。民族黨話喎，要「拒絕輸入中國醫護人員在港執業」，嗱嗱嗱，問題嚟喇，到底「輸入」兩個字係點解？特區政府從來冇話過內地醫護人員可以自動喺香港執業，除咗一啲特殊情況外，內地醫護人要喺香港執業，一定要獲得香港醫務委員會批出嘅執業資梧，以證明水平合乎香港標準同要求。

民族黨要入「一刀切」拒絕內地醫護人員來港執業，即係連考香港醫委會執業試都唔畀，呢個仲唔係不折不扣歧視？呢個仲唔係「政治干預專業」？呢個仲唔係違反自然公義？你公民黨到底撐緊啲乜呀？呢個咁嘅政黨都可以去撐，香港有你哋班政客，真係令人好心寒呀！香港市民，大家認清呢班人真面目未呀？

原圖：楊岳橋Facebook專頁