喺呢個網絡世界，從來都係「非黑即白」，唔理你講嘢係咪有道理，只係有網民發言你唔係屬於佢果一「派」，就算支持開你，轉個頭就可以當你係敵人，甚至係「死敵」。最近，有個工作室出咗本關於大灣區嘅書，而新書發布會邀請到全國政協副主席梁振英做分享嘉賓，隨即引來一班「黃絲」網民同包括《蘋果日報》在內嘅盲反派喉舌媒體群起攻訐，一時又話工作室「投共」，一時又話人冇「風骨」。廣男真係好懷疑，難道全香港嘅人都要「反共」、「反大灣區」，先稱得上叫有風骨？

工作室「何罪之有」？

廣男講緊嘅係一個叫《史檔》嘅歷史社交平台，佢上年出咗本書叫《區區有故講》，介紹香港嘅掌故同歷史；今年，負責《史檔》嘅「史檔工作室」決定出第二本書，內容係介紹大灣區規劃內十一個城市嘅種種，仲喺新書發布會邀請到梁振英講番書入面有關廣東省喺改革開放初期嘅種種經歷同趣聞。所謂「一石激起千重浪」，一班玻璃心黃絲網民喺《蘋果日報》帶頭炒作下，竟然「條件反射」式話工作室「投共」、「冇風骨」云云。但大家諗真啲，《史檔》做錯咗乜呢？SORRY，係冇囉。

如果大家有留意開盲反派話人「洗腦」嘅技倆，通常都係喺一啲出版物或者平台裡面，發掘一啲佢哋認為係「洗人腦」嘅內容，然後就抽出嚟大肆宣揚，話人哋「投共」、「洗腦」、「教壞細路」等等；但今次佢哋攻訐《史檔》同「史檔工作室」，完全唔係因為《史檔》或者《區區有故講》本書嘅內容有咩問題，而只係見人本書有「大灣區」三個字，同埋請到梁振英做嘉賓就瘋狂攻訐，剩估呢一點，已經知道班黃絲網民係幾咁唔理性，又幾咁唔講道理。

事事政治先行

事實上，就連《蘋果日報》呢份率先炒作嘅盲反派喉舌，亦講唔出《史檔》個專頁同埋本新書嘅內容有乜問題；洗腦？講大話？作歷史？統統都冇囉，佢同呢班黃絲網民之所以咁大反應，完全只係唔鍾意「大灣區」同埋梁振英，咁仲唔係「政治凌駕一切」？況且大家諗諗，「大灣區」作為香港喺未來幾年、十年甚至幾十年都會面對嘅發展問題，本書介紹「大灣區」地方，根本就冇問題！至於請梁振英做嘉賓，本書入面有一定章節談及到國家當年改革開放嘅歷史，唔請梁振英等人做分享嘉賓，唔通請盲反派政客、學者做嘉賓咩？！

一句到尾，「黃媒」以至班網民咁大反應，都係因為政治立場作怪；但係「史檔」從來無隱瞞過自己係屬於邊個機構，或者自稱係盲反派支持者，就如某報紙好容易就搵到「史檔」係屬於邊個機構。如果一個歷史平台（或者其他平台、其他人士）要「立場」得到「黃媒」認證先為之正當，咁樣恐怕香港變成「一言堂」喇，不過大家放心，筆者好肯定《史檔》唔會就咁跪低，呢種黃絲嘅奸計係唔會得逞嘅！ 

原圖：網上圖片