政府考慮取締搞「港獨」搞到去台灣嘅「香港民族黨」（下稱「民族黨」），盲反派班人雖然平時口口聲聲話自己唔贊成「港獨」，但竟然又一窩蜂走去撐「民族黨」，畀人一種非常矛盾嘅觀感；近兩日發表極多言論嘅梁家傑，就話「民族黨」如果被取締，可能第時傳媒採訪以「民族黨」身份發言嘅陳浩天、老師同學生討論「港獨」，都有可能會墮入法網，「每個人都可以成為下一個受害者」咁話。點解班盲反派講得咁誇張？原因好簡單，佢哋好明顯就係要散播恐懼，誤導市民企喺違憲、違法嘅「民族黨」一邊。

陳浩天明顯在搞「港獨」 老師豈能類比？

根據盲反派嘅「神邏輯」，就係如果「民族黨」最終被取締嘅話，第時啲老師同學生討論，或者媒體訪問「民族黨」陳浩天都可能會被入罪，呢樣係咪真呢？囍雨唔熟法例唔敢斷言，但平常媒體採訪、師生討論能夠同陳浩天嘅言行類比嗎？例如陳浩天創黨講明要「香港獨立」、搞「港獨」集會、話要「武裝革命」，甚至走到台灣同「台獨」份子話要搞獨立等等。點解梁家傑會認為傳媒訪問等情況能夠同傳媒訪問作比較呢？

只要用常理諗一下，都會知道以上行為根本唔能夠同陳浩天「相提並論」，因為陳浩天係用「以年計」嘅時間策劃一場又一場嘅「港獨」活動，如果唔係今次政府出手話考慮取締佢，分分鐘會令到人誤會喺香港搞「港獨」係合法嘅。再諗深一層，政府今次做嘢完全係根據法例行事，梁家傑呢班政客平時唔係最鍾意講法治嘅咩？而家政府依法辦事都唔得？呢班政客好似惡咗啲喎！

盲反派其實係為自己

講到尾，盲反派嘅人接力出嚟力挺「民族黨」同埋陳浩天（噚日仲搞埋聯署），咁樣唔代表佢哋認同陳浩天嘅政見，或者佢哋本身同陳浩天係「朋友」。佢哋咁落力出嚟支持陳浩天，其實係想保住佢哋班人以後可以繼續講甚至做出危害國家安全嘅事。呢班人平時就係用「反政府、反中央」嘅面目「吸選票」，今次政府嚴肅處理陳浩天事件事小，如果他日執正嚟做，依法處理呢班分裂國家嘅人事大嘛！你懂的！

原圖：Takungpao