噚日保安局局長李家超就話，考慮緊助理社團事務主任根據《社團條例》所作嘅建議，禁止香港民族黨運作。轉個頭，成班盲反派就衝出嚟想保住民族黨，話政府咁做係損害言論自由、結社自由云云。之但係，政府一早已經講到明自由唔係無界線，「港獨」份子鼓吹「港獨」，係損害國家主權、損害一國兩制，民族黨陳浩天不斷挑戰呢條底線，政府採取行動維護國家主權、維持公共秩序，絕對係應有之義！盲反派口口聲聲話「反對港獨」，但又走晒出嚟盲撐民族黨，咁係唔係自相矛盾呢？

民族黨搞「港獨」 證據確鑿

盲反派噚日係咁幫民族黨口，好似民主黨主席胡志偉咁，佢話政府禁止民族黨運作，係破壞《基本法》所賦予嘅言論自由同結社自由。不過，事實係民族黨所做嘅已經唔止「言論」同「結社」咁簡單，而係已經多次作出具體行為損害國家主權；民主黨等盲反派人士平時又話要「反港獨」，而家政府依法辦事又要畀佢哋攻訐，大家話佢哋到底想點呢？

民族黨係佢哋個網站已經列明建立「香港共和國」係佢哋綱領之一，除咗噚日囍雨提過陳浩天今年多次去台灣出席「台獨」組織活動外，民族黨仲曾經喺中學外派傳單，宣傳「港獨」，又話幫中學生成立「港獨」組織添。咁樣荼毒香港青少年，唔通仲係「言論自由」同「結社自由」咩？仲有，民族黨喺2016年3月成立無幾耐，陳浩天出席大學論壇嘅時候，仲話唔排除透過「武裝起義」推動「港獨」，佢咁樣講到明係「武裝」，仲唔係破壞國家安全、破壞公共秩序？

自由有限制是人所共知

事實上，自由有限制呢一點，差唔多係人所共知嘅事嚟，就好似本身係執業大律師嘅立法會議員梁美芬所講，《國際人權公約》第19條第3款講明，言論自由唔係無限制，而限制範圍包括國家安全同公共安全等。今次政府終於對宣傳「港獨」嘅社團採取行動，正正就證明呢一點，法律係唔容許有社團試圖破壞國家安全繼續運作，亦警告呢班平時用「言論自由」嚟做擋箭牌嘅盲反派。

無恥政客煽動「港獨」，不論係「明獨」定「暗獨」，理論上都應該同民族黨一樣，唔可以畀佢哋Run落去，咁樣既係為咗保障國家安全，亦避免咗政客利用議題喺香港「搞風搞雨」。最後，對於「香港眾志」常委羅冠聰就話政府製造「寒蟬效應」、「白色恐怖」，囍雨想講，「香港眾志」等「暗獨派」成日利用唔同議題散播恐懼，又唔畀政府出手禁「港獨」社團，點睇都係佢哋製造「寒蟬效應」、「白色恐怖」多啲啦！

原圖：RTHK