四名因為宣誓玩嘢而被DQ議員資格嘅盲反派政客，日前聯同多名盲反派自己友，舉行聲稱係要「紀念DQ一週年」嘅集會，結果出席人數寥寥可數，得嗰80人參與，場面極度冷清之餘，更加係狠狠咁摑咗呢班只顧炒作政治議題、無視香港經濟發展同民生事項嘅議員一大巴掌。時移世易，盲反派想繼續單純靠炒作政治議題食糊已經證明唔WORK，呢班政客同民情脫晒節，遲早被時代淘汰。

連「基本盤」都唔撐盲反派

話盲反派一直以來只係靠炒作政治同煽動市民恐懼情緒去撈取選票同曝光率，相信香港都冇乜人會反對。前晚之嘛，被香港法庭依法DQ嗰幾個盲反派政客，又再次出嚟嘗試搞風搞雨，想靠舉行參與人數眾多嘅集會去爭取返些少支持，可惜事與願違吖，就連原本支持盲反派嘅所謂「基本盤」都唔睬佢哋，集會場面甚至可以用門可羅雀去形容，認真諷刺。

講明先，囍雨今次並唔係想笑參加集會人數少，而係想話，參與呢啲政治集會嘅人數之所以咁少，全因班盲反派政客本身對個社會嘅認知就「離晒地」，以為靠純政治議題號召就可以叫返幾十萬人出嚟撐佢哋；事實話畀我哋聽，個世界已經唔係咁囉。

市民唔再BUY單炒政治議題

今次其實已經唔係盲反派首次，因為佢哋單純炒作政治議題同一味靠嚇而失敗嘅例子實在太多。遠嘅就唔講喇，講返近嘅；之前盲反派想炒作「一地兩檢」議題，一時又話行近內地口岸區會畀內地執法人員捉入去呀、一時又話西九高鐵站好多秘道，會出現違反《基本法》嘅「跨境執法」等等，講到似層層咁，唔用腦去思考嘅話，真係會覺得幾恐怖架。可惜，香港市民愈來愈叻，就算盲反派出盡法寶，好似拍片誤導市民、擺街站、搞遊行、搞簽名運動等等，件事最終都係炒唔起囉。

盲反派太天真？

香港市民真係一啲都唔蠢，當見到周邊地區發展已經不斷超越香港，正常人都會靜落嚟諗諗點樣可以維持競爭力，等自己唔好畀呢個世界潮流淘汰；另一方面，當市民近年不斷見到盲反派「民主為名，獨裁為實」、自打嘴巴、雙重標準、民主黨林子健疑似自導自演跨境執法鬧劇、佔領三人組公然「走數」唔肯認罪之後，呢班盲反派政客真係以為市民仲會盲目支持佢哋？拜託，唔好咁天真啦！都係早啲「回頭是岸」吧喇！

原圖：RTHK