早前30幾名英國國會議員聯署，要求英國外交部「關注」香港情況仲揚言唔少香港盲反派政客因為《公安條例》被告甚至入獄，又舉出「港獨份子」梁天琦、梁頌恆同游蕙禎等例子，大有一種「鼓吹」暴力嘅意味。對於呢啲外國勢力嘅干預，香港嘅盲反派政客唔單止唔反對，仲好似好歡迎咁，其中民主黨立法會議員林卓廷就「分析」，話外國議員聯署對中國政府有一定壓力。廣男喺度，真在要譴責林卓廷，呢種不問是非借，只求外國勢力介入香港事務的行為，根本就同「賣港」冇分別！

外國議員不一定對

話說英國嗰30幾個國會議員聯署，舉出梁天琦等人入獄做例子，話香港自由同法治「受壓」云云。對此呢種說法，廣男絕對唔認同；撇除較為複雜嘅法律觀點，梁天琦也好、梁頌恆又好，佢哋根本唔係和平表達意見，而係訴諸暴力，甚至令到他人受傷；呢啲外國政客唔明、扮唔明，唔緊要，作為香港政客咪解到對方明白囉，偏偏林卓廷唔單只唔解釋，仲要學人玩「附和」，到底呢個林卓廷仲有冇政治道德可言？

事實上，林卓廷勾結外國勢力都唔係今日嘅事。就上年11月之嘛，佢代表立法會訪英嘅時候，除咗借機「做自己嘢」，喺英國繼續炒作UGL事件、抹黑前特首梁振英之外，仲喺外國政客面前批評港府嘅普選方案，要求英國發聲云云，擺明叫外國勢力干預香港事務。香港政改，完完全全係中國國家內部事務，身為香港立法會議員，公然要求外國政客介入本身已經非常離譜，當今日當班英國國會議員又再「老屈」香港嘅時候，呢個林卓廷竟然變本加厲玩「附和」，真係睇到香港人眼冤呀。

林卓廷事事關心 唯獨不理林子健

見到林卓廷「家事國事天下事，事事關心」，廣男又好奇喇，點解香港發生乜事都好似關林卓廷事咁，但偏偏佢有份出樣、出名、出面去「力撐」嘅林子健疑似自編自導自演綁架鬧劇時，呢個成日將自己做過廉署初級調查人員一事擺喺口邊嘅政客，又會突然消失得無影無蹤架呢？唔通林卓廷只係關心點樣抽政治油水，對啲冇晒利用價值嘅「好兄弟」就即時玩割席？令人好心寒呀！

原圖：大公報