要數世界上最霸道、最唔講道理、最鍾意搬龍門嘅國家，肯肯定非當今世界唯一超級大國「美國」莫屬。網上有唔少人稱呼「美國」做「美帝」，用意係諷刺呢個國家只會奉行單邊主義，要全世界不分種族同自身國情，必須跟佢嗰一套行事；最新鮮滾熱辣嘅事，當然係美帝總統特朗普近來大開地圖炮，無差別咁向盟友同競爭對手中國開徵關稅。最新消息係，主動開打貿易戰嘅美帝，竟然要求世界貿易組織檢討中國嘅會員資格喎，你話係唔係咁晒可笑呢！

美帝惡人先告狀

要知道美帝喺呢件事上有幾可笑，大家必須先知世貿組織係一個乜嘢機構。所謂世貿組織，主要功能就係監督各成員經濟體之間履行各種貿易協議嘅國際組織、調解成員經濟體之間貿易上嘅紛爭，以及為各成員提供解決貿易爭端同談判嘅場所。

好喇，了解咗世貿組織係乜嘢一回事後，我哋不如又睇睇美帝近來嘅舉措先。首先，關於中美貿易戰；特朗普競選期間，一直話要縮減同中國之間嘅貿易逆差，最終去到今年七月初，正式宣布向340億美元（約2652億港紙）中國進口貨品徵收25%關稅，而且更計劃將徵稅範圍追加160億美元（約1248億港紙），即係合共向500億美元（約3900億港紙）中國進口貨品徵重稅。

大開地圖炮 全世界係咁炸

查實，中美貿易戰並唔係特朗普政府唯一一場貿易戰，只不過因為規模大，所以先至特別引起關注。大家如果唔善忘，美帝其實一早已經向所謂盟友開刀，好似喺舊年十一月就已經增加由加拿大進口美帝木材關稅到21%、今年年初起對進口洗衣機徵收20%關稅（受影響最大經濟體之一係「南韓」！），而美帝亦喺三月底開始對進口鋼材同鋁材分別徵收25%同10%關稅，針對嘅對象絕對係全世界！

特朗普口口聲聲話要縮短同各個經濟體之間嘅貿易逆差、保障自己國家部份行業同工人生計，講穿咗其實即係貿易糾紛啦，作為世貿組織成員，美帝遇到貿易糾紛，好應該將問題向世貿組織投訴，透過現存同既定機構去磋商同調解，甚至等世貿組織相關機構去仲裁，而唔係繞過晒所有制度，擅自向中國同其他國家開打貿易戰囉！咁即係行私刑啦、即係邊個惡就邊個話事啦，係唔係咁解呀，美帝！

最唔守規矩國家 – 美帝

一個完全唔尊重世貿組織嘅成員，今日竟然公開指控中國，仲要世貿組織檢視中國嘅會員資格喎，真係「唔識畀佢嚇死、識就畀佢笑死」！一個咁橫蠻無理，專門繞過國際組織規定同秩序嘅國家，老老實實，真係完全唔值得尊重。囍雨奉勸特朗普，打貿易戰永遠唔會有贏家，人人都只會係輸家，而家連北韓都肯返去談判桌，跟國際秩序嗰一套去玩，你老人家好笑就唔好咁霸道，做事守下規矩啦。

原圖：新華社資料圖片