發起「違法佔領」又走拒絕找數、推咗大量年輕人落火坑但想獨善其身嘅戴耀廷，今日喺佢嗰份喉舌報紙撰文，話香港已經成為「新冷戰戰場」，香港要明白喺呢盤大棋局嘅處境，先可以訂出相應對策咁話。戴耀廷篇文寫咩，其實一啲都唔重要，因為稍為正常嘅市民都清楚，呢個人已經冇誠信可言，為咗「政治」兩個字乜嘢大話都講得出。喺最新呢篇文裡面，戴耀廷又再話喎，中央政治自2014年起逐步收窄港人自由空間云云，囍雨真心想問，乜真係咁咩？

戴耀廷其身不正 劣跡多到數唔晒

2014年係咩日子，點解戴耀廷覺得港人自由空間開始被收窄呢？最顯明嘅例子，自然係嗰一場撕裂無數香港家庭、破壞人際關係、損害香港法治、歷時79日嘅「違法佔領」啦。戴耀廷等等「違法佔領」發起人，當初向公眾承諾「佔領」過後會向警方自首、承擔罪責、完善法治，但早排已經表明會「走數」，呃咗咁多香港人陪你一齊犯法，自己就用市民捐嘅錢打官司，真係夠晒「過癮」喎。

好喇，講返正題，到底香港人嘅自由有冇被收窄過呢？其實只要舉一個好好好簡單嘅例子，如果香港人自由真係有被收窄，囍雨就真係唔明點解擺明係「違法佔領」發起人、擺明煽動市民搞「港獨」、擺明去到台灣同其他分離主義者大集會嘅戴耀廷仍然可以喺報章撰文，又仍然可以大搖大擺喺大學裡面荼毒莘莘學子喇。乜呢啲唔係就係「自由」咩？呢涉及宣揚「港獨」嘅所謂「自由」（雖然囍雨並不認同屬於「自由」一部份）都仍然冇被收窄到，咁到底戴耀廷憑乜話香港自由被收窄？傻的嗎？

評級機構證香港表現優異

如果嫌囍雨嘅分析唔夠權威，唔緊要，我哋即管又睇睇世界權威評級機構點睇香港。由加拿大菲沙研究所（Fraser Institute）公布嘅 2017年人類自由指數排名表中，香港名列世界第二！呢個人類自由指數排名，係以公民自由、經濟自由、法治、行動自由、婦女權利同其他很多方面作為指標去衡量，香港喺159個國家或地區裡面排二，試問又有幾唔自由？

講到公民自由，「法治」亦係另一個不能忽略嘅範疇。講到「法治」，香港就勁喇，雖然受到戴耀廷等人不斷挑戰同破壞，但根據「世界銀行：世界管治指標」，香港法治仍然排喺亞洲第二、全球第十五；而來自美國嘅知名非政府組織「世界正義工程」，亦將香港法治評為全亞洲第三、全球第十六，比起大部份所謂西式民主國家，香港表現有幾優秀已經有目共睹。

戴耀廷同盲反派 為私利抹黑香港

事實證明，今日香港喺「自由」同「法治」方面表現，仍然位於世界前列，戴耀廷同埋班盲反派，成日夾埋一齊「唱衰香港」，一時又話香港禮崩樂壞、一時又話香港差過「港英年代」。但事實係點呢？事實係呢班人不斷捩橫折曲，為咗達到一己政治私利，不惜用大話、用抹黑、用誹謗去污名化香港，呢班人為咗「政治」兩個字，幾咁自私同卑鄙嘅事都可以去做，香港人真係仲要信佢哋？

原圖：RTHK