民主黨立法會議員許智峯今年四月喺立法會承認強搶女EO手機，仲要攞人電話入廁所「偷窺」，最後搞到要出嚟鞠躬道歉之餘，自己亦畀警方拘捕。對於許智峯到而家都未被正式起訴，社會已經有聲音要求快啲「法辦」許智峯，而本身係中西區區議員嘅佢，日前亦被其他議員喺所屬嘅區議會提出譴責，但喺民主黨幾個區議員包庇下不獲通過；而更過份嘅就係，許智峯自己發言嘅時候，仍然想將責任賴落政府度。囍雨真心懷疑，反對譴責許智峯嗰班政客，仲有乜資格去做議員呢？

早料民主黨玩包庇

老實講，有區議員喺區議會層面提出要譴責許智峯，其實大家都應該一早估到民主黨會玩包庇；原因好簡單，之前民主黨高層明明都已經就許智峯事件鞠躬道歉，仲揚言會紀律調查許智峯，結果呢？結果就係民主黨嘅紀律委員會最後以「案件調查中」等理由，將黨內對許智峯嘅調查擺埋一邊，民主黨主席胡志偉接受傳媒訪問嘅時候仲想「轉軚」，話覺得許智峯嘅錯未至於要譴責佢。所以呢，就算去到區議會層面，民主黨繼續玩包庇真係一啲都唔出奇，而事實上就係，中西區區議會內所有民主黨黨籍嘅議員都冇聯署囉！

至於許智峯本人，就更加係胡鬧，其實佢本來可以借發言機會再次表達歉意，但據傳媒報道，佢竟然仲想鬧番政府轉頭，話要「反思」政府利用「狗仔隊跟出跟入」嘅做法。許生，如果唔係盲反派成日搞「拉布」、「流會」，政府又駛乜派人到立法會呢？再者，政府人員紀錄議員出入係喺公眾地方進行，連私隱專員都話冇問題架喎，你仲想屈？

必須繼續追究許智峯

對於許智峯冇悔意、民主黨玩包庇，囍雨只能夠用「死不悔改」四隻大字形容佢哋，而面對冇悔意可言嘅許智峯，囍雨覺得實在冇理由唔繼續追究佢；除咗警方又繼續調查之外，立法會一定要繼續跟進許智峯事件，就算最後調查之後譴責許智峯嘅在席議員唔夠三分之二，呢個動作都一定要做，因為立法會要話畀全港市民聽，立法會唔接受暴力行為，更加唔接受行使完暴力仲要諉過於人嘅民主黨政棍！

原圖：RTHK