世界之大，可謂無奇不有，當一啲稀奇古怪嘅事不斷發生，大家就可能會開始「見慣不怪」；呢兩日，囍雨睇到一單新聞，話說黃之鋒舊年七一示威果時畀人包圍、襲擊，警方拉咗佢上車，據報因為佢有掙扎，所以警方唯有用手銬鎖住佢先。向來「大晒」、「惡慣」嘅黃之鋒，就入稟要求警方賠償畀佢，畀審裁官裁定敗訴，仲要畀訴費。問題嚟喇，如果個個畀警方扣留，都要警方賠償，咁警察係咪唔駛做嘢呢？

黃之鋒大晒？

以前如果有人畀警方扣留，大家都唔會特別去質疑警方，更遑論係要求警方賠償啦！黃之鋒呢個Case，佢話警方當時係屬於襲擊、非法禁錮，所以警方賠償，咁大家又要問下黃之鋒喇，當時嘅情況好似係黃之鋒畀人包圍緊喎，警方而家拉開佢、拘留住佢先，黃之鋒又話人哋錯要人賠錢；掉番轉，如果警方任由佢畀人襲擊、有危險，咁果時黃之鋒係咪又可以話警方「見死不救」、失職？所以囍雨成日都講，警方基本上點做，黃之鋒都係警方唔啱架啦，真係龍門任佢搬，佢玩晒啦！

呢件事亦都反映咗盲反派一貫嘅心態，就係佢哋係「大晒」、「惡晒」嘅，如果佢哋搞事、衝擊，呢啲係「公民權利」，警察都唔可以拉佢哋；如果警方、檢控部門有行動，咁佢哋就會話係「政治打壓」，而黃之鋒正正就係呢類人。好似佢幾年前煽動人衝擊政總東翼前地一樣，明明係犯法都講到自己冇錯咁，今次被拘留然後要警方賠償，其實道理都係一樣。

支持警方執法

所以呢，囍雨一定全力支持警方執法，如果覺得有需要扣留任何政客，咪扣留囉；如果警察唔維持秩序，咁要警方嚟做咩呢？囍雨記得以前睇黃之鋒向警察索償呢單新聞嘅時候，黃之鋒講過類似警察扣留佢令佢聲譽受損嘅說話；警方執法係天經地義嘅事，審裁官都已經判黃之鋒敗訴，好心黃之鋒尊重下法治，唔好下下都「妖魔化」警察或者政府先得架！無論黃之鋒係唔係良好市民，囍雨覺得警方都會一視同仁，好好保護佢囉。

原圖：Takungpao